ناقص ٹاؤن پلاننگ کی وجہ سے لاہور آلودگی کا گڑھ بن گیا ،لاہور ہائیکورٹ

لاہور(کورٹ رپورٹر) لاہور ہائیکورٹ کے جسٹس جواد حسن نے پاکستان کونسل آف آرکیٹیکٹ اینڈ ٹاؤن پلانرز رولز ترمیم کیخلاف درخواست پر سماعت کرتے ہوئے اپنے ریمارکس میں کہا کہ ناقص ٹاؤن پلاننگ کی وجہ سے لاہور آلودگی کا گڑھ بن گیا ہے، مجھے لاہور میں آکر مٹی پھانکنا پڑتی ہے،انہوں نے درخواست چیئرمین پاکستان کونسل آف آرکیٹیکٹ اینڈ ٹاؤن پلانرز کو بھجواتے ہوئے قانون کے مطابق فیصلہ کرنے کا حکم دیدیا۔عدالت نے ریمارکس دیئے کہ ایسا لگتا ہے لاہور ٹاؤن پلاننگ کے بغیر بنایا گیا ہے، بادی النظر میں لگتا ہے لاہور ٹاؤن پلاننگ کے بغیر بنایا گیا ہے، اسلام آباد شہر بہترین ٹاؤن پلاننگ کے تحت بنایا گیا ہے، اسلام آباد میں آپ پیدل بھی چلیں تو ماحولیاتی آلودگی محسوس نہیں ہوتی، کونسل کے وکیل مبین الدین قاضی ایڈووکیٹ نے مؤقف اختیار کیا کہ حکومت نے رول 78 بی میں قانون کے برعکس ترمیم کی، ترمیم کے بعد آرکیٹیکٹ ڈگری ہولڈر کو کونسل رجسٹرڈ نہیں کرے گی، ترمیم کے مطابق اب صرف ٹاؤن پلانر کی ڈگری ہولڈر کو کونسل رجسٹرڈ کرے گی۔