عمران خان کی رہنماؤں سےملاقات نہ کرانے پر سپرنٹنڈنٹ اڈیالہ جیل آج طلب

راولپنڈی ( نیوز ایجنسیاں) اسلام آباد ہائی کورٹ نے بانی پی ٹی آئی عمران خان کی سیاسی رہنماؤں سے ملاقات نہ کرانے پر اڈیالہ جیل کے سپرنٹنڈنٹ کو آج طلب کر لیا۔اسلام آباد ہائیکورٹ کے جسٹس سردار اعجاز اسحاق خان نے عمران خان کی سیاسی رہنماؤں سے ملاقات نہ کرانے پر توہینِ عدالت کی درخواست پر سماعت کی، بانی پی ٹی آئی کے وکیل ایڈووکیٹ فیصل چوہدری عدالت میں پیش ہوئےانہوں نے دلائل میں کہا کہ پہلے اسی عدالت سے آرڈر ہو چکے۔عدالت نے سوال کیا کہ اب کیا صورتِ حال ہے؟ جس پر وکیل نے جواب دیا کہ پارٹی کے سیاسی رہنماؤں سے میٹنگ کینسل کر دی گئی ہے، ہم بار بار اس عدالت کو تکلیف دیتے ہیں لیکن مجبوراً ہمیں یہاں آنا پڑتا ہے۔عدالت نے سٹیٹ کونسل سے سوال کیا کہ کیا وجہ ہے کہ بار بار ایسا ہوتا ہے؟ ہمارے آرڈر کے باوجود اگر پٹیشن آتی ہے تو ہم نے لکھا تھا کہ سٹیٹ پر جرمانہ عائد ہوگا۔اسلام آباد ہائیکورٹ نے سٹیٹ کونسل کو ہدایت کی کہ آپ اس درخواست کو دیکھیں،آج سپرنٹنڈنٹ جیل کو کہیں کہ پیش ہوں۔