رانا ثنا یہ بھی بتا دیں ٹرمپ سے پارٹی میں ہلکی پھلکی پریشانی کیوں ،تجزیہ کار

کراچی (ٹی وی رپورٹ) جیوکے پروگرا م ’’رپورٹ کارڈ‘‘ میں میزبان علینہ فاروق نے کہا کہ تحریک انصاف کے زلفی بخاری کہتے ہیں کہ عمران خان کے سلسلے میں ٹرمپ سے بات کی جائے گی جبکہ رانا ثناء اللہ کہتے ہیں کہ ٹرمپ اگر عمران خان سے متعلق بات کرتے ہیں تو تحریک انصاف کا بیرونی مداخلت والا بیانیہ دفن ہوجائے گا کہ ان کی حکومت امریکہ نے گرائی تھی کیا رانا ثناء اللہ کی بات درست ہے؟ اس سوال کے جواب میں تجزیہ کار ارشاد بھٹی نے کہا کہ رانا ثناء اللہ یہ بھی بتا دیں کہ ٹرمپ کے آجانے سے ان کی پارٹی میں ہلکی پھلکی پریشانی کیوں ہے،تجزیہ کار فخر درانی نے کہا کہ اس سے نہ حکومت کی پریشانی کم ہوگی نہ زیادہ ہوگی ،تجزیہ کار محمل سرفراز نے کہاکہ زلفی بخاری کی بالکل دوستیاں ہوں گی لیکن حکومت میں کسی قسم کی گھبراہٹ نہیں ہے،تجزیہ کار آصف بشیر چوہدری نے کہا کہ عمران خان کا بیانیہ امریکہ سے متعلق کئی دفعہ بدل چکا ہے،امریکہ اور انٹرنیشنل اسٹبلشمنٹ پر پاکستان میں اثر رسوخ رکھتا ہے اور ہماری طاقتور حلقے بھی عالمی اسٹیبشلمنٹ کی بات کو اہمیت دیتے ہیں ۔ تجزیہ کار ارشاد بھٹی نے کہا کہ کاملا ہیرس پاکستان سے مشورہ لے لیتیں انہیں الیکشن کمیشن اور سپریم کورٹ پر فوکس کرنے کی ضرورت تھی تاکہ ٹرمپ سے انتخابی نشان چھین جاتا اور انٹرنیٹ روک جاتا فارم 47 وجود میں آجاتا اور فاتحانہ تقریر آپ کرتیں اور ٹرمپ نااہل ہو کر جیل میں بیٹھے ہوتے۔ زلفی بخاری کہہ چکے ہیں کہ الیکشن کے دوران ایک بااثر پاکستانی کی ٹرمپ سے ملاقات ہوئی تھی اور سب کچھ گوش گزار کیا گیا تھا اور اس پر ٹرمپ کا کہنا تھا کہ یقینی بناؤں گا کہ عمران خان کے ساتھ زیادتی نہ ہو۔