سلمان کے بعد شاہ رخ خان کو بھی جان سے مارنے کی دھمکی

ممبئی (اے پی پی) سلمان خان کے بعد معروف بھارتی اداکار شاہ رخ خان کو قتل کر دینے کی دھمکی موصول ہونے پر ممبئی پولیس نے مقدمہ درج کر لیا۔ بھارتی میڈیا رپورٹس کے مطابق بالی ووڈ اداکار شاہ رخ خان کو انکے پروڈکشن ہاؤس میں دھمکی آمیز کال موصول ہوئی جس میں انہیں جان سے مار نے کی دھمکی دی گئی۔ فون کال جس نمبر سے آئی وہ چھتیس گڑھ کے علاقے رائے پور میں فیضان کے نام سے رجسٹرڈ اور فعال ہے۔شاہ رخ خان کی ٹیم نے اس حوالے سے ممبئی پولیس باندرہ سٹیشن میں مقدمہ درج کرا دیا۔ پولیس کے مطابق رائے پورچھتیس گڑھ کے رہنے والے فیضان نامی نوجوان نے مبینہ طور پر 50 لاکھ روپے تاوان کا مطالبہ کیا۔ واضح رہے کہ اس سے قبل بالی وڈ کے سپر سٹار سلمان خان کو بھی لارنس بشنوئی گینگ کی جانب سے ایک بار پھر قتل کی دھمکی موصول ہو چکی ہے۔