عمران کی ملاقات نہ کرانے پر توہین عدالت کیس، جیل سپرنٹنڈنٹ طلب

اسلام آباد (خبر نگار ، خصوصی نامہ نگار)اسلام آباد ہائیکورٹ نے عدالتی احکامات کے باوجود بانی پی ٹی آئی عمران کی ملاقات نہ کرانے پر توہین عدالت کیس میں جیل سپرنٹنڈنٹ کو آج صبح 10 بجے طلب کر لیا ، جبکہ اسد قیصر، شبلی فراز،علامہ ناصر عباس ،عون عباس بپی ،شیخ وقاص اکرم و دیگر کو اڈیا لہ جیل سے 3 کلومیٹر دور روک لیا گیا۔ جسٹس سردار اعجاز اسحاق نے سرکاری وکیل کو مخاطب کر کے ریمارکس دئیے کہ ایسا بار بار کیوں ہوتا ہے؟ ہم نے لکھا تھا ہمارے آرڈر کے باوجود اگر پٹیشن آتی ہے تو سرکار پر جرمانہ عائد ہو گا،رخواست گزار وکیل فیصل چوہدری ایڈووکیٹ نے کہا کہ عدالت نے جیل رولز کے مطابق بانی پی ٹی آئی سے ملاقات کرانے کے آرڈر کئے تھے مگر پارٹی رہنماوں کی جیل میں بانی پی ٹی آئی سے میٹنگ پھر منسوخ کر دی گئی۔ شبلی فراز ، عمر ایوب اور اسد قیصر کی ملاقات نہیں کرائی گئی۔ ہمیں مجبوراً بار بار عدالت آنا پڑتا ہے، قبل ازیں اڈیالہ سنٹرل جیل راولپنڈی میں بانی پی ٹی آئی سے ملاقات کے لیے آنے والے 8پارلیمنٹیرینز کو اجازت نہ مل سکی اور وہ چار بجے تک انتظار کے بعد جیل سے واپس چلے گئے۔