کے پی حکومت کا الیکشن کمیشن کیخلاف پشاور ہائیکورٹ جانے کا فیصلہ

پشاور (این این آئی)مشیرِ اطلاعات خیبر پختونخوا بیرسٹر محمد علی سیف نے بتایا ہے کہ کے پی حکومت نے الیکشن کمیشن کیخلاف پشاور ہائی کورٹ میں درخواست دائر کرنے کا فیصلہ کیا ہے۔بیرسٹر محمد علی سیف نے اپنے بیان میں بتایا کہ پی ٹی آئی کو مخصوص نشستیں نہ دینے پر پشاور ہائی کورٹ میں درخواست دائر کی جائیگی۔ الیکشن کمیشن نے عدالتی فیصلے کے باوجود مخصوص نشستوں کا نوٹیفکیشن جاری نہیں کیا۔ خیبر پختونخوا میں سینیٹ انتخابات کیلئے شیڈول بھی تاحال جاری نہیں کیا گیا۔اْنہوں نے بتایا کہ درخواست دائر کرنے کی منظوری وزیراعلیٰ کی زیر صدارت کابینہ اجلاس میں دی گئی ہے، کابینہ نے پٹیشن دائر کرنے کیلئے ایڈووکیٹ جنرل کو اجازت دیدی ہے۔الیکشن کمیشن تاخیری حربے استعمال کرنے کے بعد اب سپریم کورٹ کے احکامات کی خلاف ورزی کر رہا ہے اور عدلیہ کی حکم عدولی پر الیکشن کمشنر توہین عدالت کے مرتکب ہو چکے ہیں۔