طالبان حکومت نے ممبئی کے سفارتی مشن میں پہلا قونصلر تعینات کردیا

اسلام آباد (فاروق اقدس/جائزہ رپورٹ) ایک طرف تو دنیا بھر کی حکومتیں افغانستان میں قائم ہونے والی طالبان حکومت کو تسلیم کرنے اور ان سے سفارتی راہ و رسم بڑھانے سے گریزاں ہیں تو ایسے میں بھارت طالبان سے اپنے رابطوں اور ملاقاتوں میں مسلسل اضافہ کر رہا ہے اور اب اس حوالے سے ایک اہم پیشرفت دیکھنے میں یہ آئی ہے کہ طالبان حکومت نے بھارت کے اہم شہر ممبئی کے سفارتی مشن میں اکرام الدین کامل کو اپنا قونصلر مقرر کر دیا ہے۔ ترجمان بھارتی وزارت خارجہ کا کہنا ہیے کہ افغان کمیونٹی کی بڑی تعداد کے پیش نظر قونصلر خدمات کی ضرورت تھی اکرام الدین کامل نے بھارتی حکومت کی جانب سے فراہم کی گئی سکالرشپ پر سات برس تک بھارت میں ہی تعلیم حاصل کی تھی اور اب وہ ممبئی کے قونصل خانے میں ایک ’’سفارتکار‘‘ کے طور پر کام کریں گے۔ یہ پہلا موقعہ ہے کہ بھارت کے افغان مشن میں کسی قونصلر کی تعیناتی ہوئی۔ تاہم بظاہر ان کی حیثیت ایک ایسے افغان شہری کی ہوگی جو افغانوں کیلئے خدمات انجام دے رہا ہوگا۔ یاد رہے کہ چند دن پیشتر ہی ایک بھارتی وفد نے کابل کا دورہ کیا تھا جس نے طالبان حکومت کے عبوری وزیر دفاع ملا محمد یعقوب سے ملاقات کی تھی اور افغانستان میں کاروباری گروپوں کو چابہار بندر گاہ استعمال کرنے کی ترغیب بھی دی تھی۔ اس کے علاوہ بھارتی وفد نے کابل کو افرادی قوت فراہم کرنے کی بھی پیشکش کی تھی۔ افغانستان کیلئے بھارتی وزارت خارجہ کے اہم ایلچی جتندر پال سنگھ نے بھی طالبان حکومت کے وزیر خارجہ امیر خان متقی سے بات چیت کی تھی۔