پی ٹی آئی کی سیاسی پیدائش احتجاج،دھرنے اور انتشار کی شرط پر ہوئی، عظمٰی بخاری

لاہور(خصوصی نمائندہ،خصوصی رپورٹر)وزیر اطلاعات پنجاب عظمٰی بخاری نے کہا ہے کہ تحریک انصاف کی سیاسی پیدائش احتجاج،دھرنے، جلسے جلوس اور انتشار کی شرط پر ہوئی تھی۔ جو خوشحالی ملک میں لوٹ رہی ہے وہ فتنہ گروپ کو ہضم نہیں ہو رہی۔ چور چور کی گردان الاپنے والوں کا اپنا پورا ٹبر چوری میں رنگے ہاتھوں پکڑا گیا ہے۔ ایمپائر کی انگلی،سازشی کردار اور سہولت کاری بانی پی ٹی آئی کی سیاست کا قبلہ رہے ہیں۔ فسادی گروہ نے قوم کے بچوں کو اپنے اقتدار کی ہوس میں جھونک دیا ہے، جبکہ ان کے اپنے بچے لندن میں لگژری لائف سٹائل انجوائے کررہے ہیں۔ تحریک انصاف کی سیاست ʼʼسڑک چھاپʼʼسیاست سے بھی بدتر ہوچکی ہے۔ نوازشریف نے کہا تھا ہم سڑکیں بناتے جائیں گے تم سڑکیں ناپتے جاؤ گے۔ مریم نواز پنجاب میں تاریخی اور انقلابی اقدامات کررہی ہیں۔ مریم نواز نے چند ماہ میں پنجاب کے ہر طبقے اور ہر شعبے کے لئے ریلیف پیکج اور منصوبے شروع کیے ہیں۔ سیاسی لوگ سیاسی جدوجہد کرتے سیاست کی آڑ میں فیڈریشن پر چڑھائی کے خواب نہیں دیکھتے۔ پرامن احتجاج کی آڑ میں شرپسندی پھیلانے کی اجازت ہرگز نہیں دیں گے۔ جو قانون توڑے گا، شہریوں میں خوف ہراس پھیلائے گا اس سے سختی سے نمٹا جائے گا۔