آزادی کی جدوجہد میں ہم فلسطینی عوام کیساتھ کھڑے ہیں، حافظ نعیم

لاہور(آئی این پی )امیر جماعت اسلامی حافظ نعیم الرحمن نے کہا ہے کہ آزادی فلسطین کی جدوجہد میں ہم فلسطینی عوام کے ساتھ کھڑے ہیں۔ تفصیلات کے مطابق امیر جماعت اسلامی کی اسلام آباد میں فلسطینی سفارت خانہ میں فلسطین کے سفیر ڈاکٹر زہیر زید سے ملاقات ہوئی۔حافظ نعیم الرحمن نے پاکستان میں تعیناتی پر نئے فلسطینی سفیر کو خوش آمدید کہا اور کہا کہ آزادی فلسطین کی جدوجہد میں ہم فلسطینی عوام کے شانہ بشانہ کھڑے ہیں، فلسطین کے حوالے سے ہماری وہی پالیسی ہے جو قائد اعظم محمد علی جناح کی پالیسی تھی۔انہوں نے کہا کہ بیت المقدس کی آزادی ہر مسلمان کے ایمان کا حصہ ہے، جماعت اسلامی کا ہر کارکن القدس کی آزادی کا نقیب ہے۔ انہوں نے کہا کہ مسئلہ فلسطین پر پوری پاکستانی قوم متحد اور یک آواز ہے، الخدمت فانڈیشن غزہ کے عوام کی امداد کے لیے اپنی سرگرمیاں جاری رکھے گی۔فلسطینی سفیر ڈاکٹر زہیر زید نے اس موقع پر کہا کہ پاکستان کے عوام اور جماعت اسلامی پاکستان کی کاوشوں کو خراجِ تحسین پیش کرتے ہیں، فلسطینی پاکستان کو اپنا دوسرا گھر سمجھتے ہیں۔ ملاقات میں جماعت اسلامی کے ڈائریکٹر امور خارجہ آصف لقمان قاضی بھی موجود تھے۔