امن کے فروغ کیلئے بھارت کو چیمپئنز ٹرافی میں آنا چاہئے، گورنر پنجاب

لاہور(اپنے نامہ نگار سے) فیڈریشن آف پاکستان چیمبر زآف کامرس اینڈ انڈسٹری(ایف پی سی سی آئی) کے زیر اہتمام امریکہ اور کینیڈا سے آئے سکھ یاتریوں کے اعزاز میں گورنر ہاؤس خصوصی تقریب کا اہتمام کیا گیا جس میں گورنر پنجاب سردار سلیم حیدر خان نے بطور مہمان خصوصی شرکت کی۔ تقریب سے ایف پی سی سی آئی کی قائمقام صدر قرۃالعین،صوبائی وزیر برائے اقلیتی امور سردار رمیش سنگھ اروڑام اور پاکستان کینیڈا ٹریڈ ایسوسی ایشن کی صدربشری رحمن نے بھی خطاب کیا، گورنر پنجاب نے کہا کہ بھارت کو پاکستان میں ہونی والی چیمپئنز ٹرافی میں آنا چاہئے کیونکہ کھیلوں کے ذریعے ہی امن آتا ہے۔ اگر چیمپئنز ٹرافی میں نہیں آئے گا تو دنیا میں اچھا امیج نہیں جائے گا۔ دریں اثناء گورنر پنجاب سے یو کے سے تعلق رکھنے والے اوورسیز پاکستانی بزنس مین عاصم ستار کی قیادت میں غیر ملکی سرمایہ کاروں اور مختلف پاکستانی کمپنیوں کے سی ای اوز پر مشتمل وفد نے ملاقات کی۔اس موقع پر گفتگو کرتے ہوئے انہوں نے کہا کہ پاکستان سرمایہ کاری کے لحاظ سے محفوظ ترین ملک ہے ۔