حکومت نے احتجاج کے سوا کوئی راستہ نہیں چھوڑا،شعیب شاہین

کراچی (ٹی وی رپورٹ) جیوکے پروگرام ”آج شاہ زیب خانزادہ کے ساتھ “ میں گفتگو کرتے ہوئے رکن کور کمیٹی تحریک انصاف ،شعیب شاہین نے کہا کہ اس بار احتجاج کے لئے ساری پی ٹی آئی قیادت باہر نکلے گی۔کٹھ پتلی حکومت نے احتجاج کے علاوہ اور کوئی راستہ نہیں چھوڑا،سینئر رہنما مسلم لیگ ن، سینیٹر طلال چوہدری نے کہا کہ پچھلے ڈیڑھ دو سال میں پی ٹی آئی ہر احتجاج میں ناکام ہوئی ہے۔ ہر احتجاج میں پی ٹی آئی وہ کام کرکے گئی جو ان کے خلاف چارج شیٹ بن گیا،بانی پی ٹی آئی ہر دفعہ کہتے ہیں یہ آخری کال ہے ، یہ وہ والی اسٹیبلشمنٹ نہیں ہے جو ڈبل گیم کرتی تھی۔حکومت اور ادارے ایک دوسرے کے ساتھ کھڑے ہیں۔اگر کوئی سمجھتا ہے کہ مذاکرات این آر او دینے کے لئے ہوں گے تو غلط ہے،میزبان شاہزیب خانزادہ نے اپنا تجزیہ پیش کرتے ہوئے کہا کہ کئی دنوں سے جاری پی ٹی آئی قیادت کے دعوؤں ، جوشیلے بیانات اورپیغامات کے بعدعمران خان نے آج اڈیالہ جیل سے پی ٹی آئی کے حتمی احتجاج کی کال دے دی ہے۔ شعیب شاہین نے کہا ہمیں گرفتاریوں سے کوئی ڈر نہیں۔ صوابی کے جلسے میں ہمیں صرف لائحہ عمل دینا تھا ،پیسوں کا مسئلہ نہیں ہے لوگ اپنے طور پر خود نکلیں گے، احتجاج کی ناکامی کے نتیجے سے متعلق شیر افضل کے بیان سے اتفاق نہیں کرتا۔جو کچھ ہمارے ساتھ ہوچکا ہے ا س سے زیادہ اور کیا ہوگا۔