راولپنڈی اسلام آباد سمیت مختلف علاقوں میں آج سے بارش کا امکان

اسلام آباد (اپنے نامہ نگار سے) جڑواں شہروں راولپنڈی اسلام آباد سمیت پنجاب کے مختلف شہروں اور بالائی علاقوں میں آج سے گرج چمک کے ساتھ بارش اور تیز ہواوں کا سلسلہ شروع ہو گا جو آئندہ تین روز تک جاری رہنے کی توقع ہے ۔ پہاڑوں پر برفباری کا بھی امکان ہے۔ بارشوں کے سلسلے کے دوران اسلام آباد ، خطہ پوٹھوہار ، خیبر پختونخوا اور بالائی پنجاب کے علاقوں میں جاری سموگ / فضائی آلودگی میں کمی اور ہوا کا معیار بہتر ہونے کی توقع ہے۔ بارشوں کے بعد پنجاب کے میدانی علاقوں میں شدید دھند پڑ سکتی ہے۔ تمام متعلقہ اداروں کو الرٹ رہنے اور کسی ناخوشگوار واقعہ سے بچنے کیلئے ضروری اقدامات کرنے کی ہدایت کر دی گئی ہے۔