عمران کی فائنل کال کا انجام پچھلی کالوں سے مختلف نہیں ہو گا،عرفان صدیقی

اسلام آباد(نمائندہ خصوصی) سینیٹ میں مسلم لیگ (ن) کے پارلیمانی پارٹی لیڈر اور خارجہ امور کمیٹی کے سربراہ سینیٹر عرفان صدیقی نے سوال کیا ہے کہ عمران خان اپنے کارکنوں کو کون سے مستقبل کے لئے باہر نکلنے کاپیغام دے رہے ہیں؟ بدھ کو سوشل میڈیا ʼایکسʼ پر اپنے بیان میں مسلم لیگ (ن) کے سینئر رہنما نے کہا کہ ‏پی ٹی آئی کی چار سالہ حکومت ، رُول آف لا کی پامالی،بے گناہ لوگوں کو جیلوں میں ڈالنے اور چوری شدہ مینڈیٹ کا بد ترین عہد تھا، عدم اعتماد کے ذریعے حکومت سے نکلنے کے بعد یہ “انقلاب" لانے کی تیرھویں فائنل کال ہے جس کا انجام پچھلی بارہ فائنل کالوں سے مختلف نہیں ہو گا۔