8 اگست کے شہداء سمیت تمام وکلاء کی گرانقدر خدمات اور قربانیوں کو قدر کی نگاہ سے دیکھتے ہیں،گورنر بلوچستان

کوئٹہ(خ ن)گورنر بلوچستان جعفرخان مندوخیل نے کہا ہے کہ ہمارے وکلاء قانون اور جمہوریت کے محافظ اور خادم ہیں۔ ہم 8 اگست کے شہداء سمیت تمام وکلاء کی گرانقدر خدمات اور قربانیوں کو قدر کی نگاہ سے دیکھتے ہیں. بلاشبہ آپ کے ذریعے معاشرے میں جمہوری رویوں کو پروان چڑھانے میں بھی تقویت ملی ہے۔ ان خیالات کا اظہار انہوں نے بلوچستان ہائی کورٹ میں منعقدہ تقریب سے خطاب کرتے ہوئے کیا۔ اس موقع پر سپریم کورٹ بار ایسوسی ایشن کے صدر رؤف عطاء، بلوچستان ہائی کورٹ بار ایسوسی ایشن کے نومنتخب صدر ایڈوکیٹ میر عطاء اللہ لانگو، ایڈیشنل اٹارنی جنرل آف پاکستان نجم مینگل اور مسلم لیگ (ن) لائٹرز ونگ کے صدر انور نسیم کاسی سمیت سینئر وکلاء کی بڑی تعداد بھی موجود تھی۔ تقریب میں شریک وکلاء سے خطاب کرتے ہوئے گورنر بلوچستان جعفرخان مندوخیل نے کہا کہ قانون کی حکمرانی کو مزید استحکام بخشنے کیلئے وکلاء برادری کا تعاون پر مبنی کردار انتہائی اہم ہے۔ گورنر مندوخیل نے قانون کی حکمرانی کو مضبوط بنانے میں وکلاء برادری کے تعاون پر مبنی کردار کی اہمیت پر زور دیا۔ انہوں نے وکلاء کے حقوق اور تحفظ کو یقینی بنانے اور ان کو درپیش مسائل کے دیرپا حل تلاش کرنے میں مکمل تعاون کی یقین دہانی کراتے ہوئے کہا کہ گورنر ہاؤس کے دروازے آپ سب کیلئے کھلے ہیں۔