دفاعی نمائش آئیڈیاز 2024 آج سے شروع ہو گی،تمام تیاریاں مکمل

کراچی(نمائندہ جنگ)دفاعی نمائش آئیڈیاز 2024کراچی کے ایکسپو سنٹر میں آج (منگل)سے شروع ہو گی ،4 روزہ آئیڈیاز 2024 دفاعی نمائش اور کانفرنس کی تمام تر تیاریاں مکمل کر لی گئی ہیں۔نمائش اور کانفرنس کا انتظام وزارت دفاع اور دفاعی پیداوار نے مشترکہ طور پر کیا ہے،آئیڈیاز 2024 میں پاکستان میں تیار ہونے والے جدید ترین اور روایتی دفاعی ہتھیاروں کی نمائش کی جائے گی۔آئیڈیاز 2024میں اسلحہ، ٹینک، جنگی طیارو ں ، ہیلی کاپٹروں اور بحری جہازوں کی نمائش کی جائے گی، آبدوزیں، ڈرونز، میزائل، سائبرڈیفنس، سیٹلائٹ اور الیکٹرانک وارفیئرا سسٹمز بھی نمائش کا حصہ ہوں گے۔خصوصی سرمایہ کاری سہولت کونسل (ایس آئی ایف سی) دفاعی صنعت کو عالمی سطح پر مستحکم اور قومی سلامتی یقینی بنانے میں پیش پیش ہے، آئیڈیاز 2024 میں ایشیا، مشرق وسطی اور جنوب مغربی ایشیا کے اہم ممالک شریک ہوں گے، سعودی عرب، متحدہ عرب امارات، قطر، بحرین، ترکیہ، ایران، یمن، چین ، بھارت، جاپان، ملائیشیا، سنگاپور اور دیگر ممالک شریک ہوں گے۔