سنٹرل سلیکشن بورڈ کا اجلاس ، وزیر اعظم نے ابھی تک تشکیل نو کی منظوری نہیں دی

اسلام آ باد ( رانا غلام قادر) سنٹرل سلیکشن بورڈ کا اجلاس، وزیر اعظم نے ابھی تک تشکیل نو کی منظوری نہیں دی ، اجلاس 25نو مبر کو طلب ،24نومبر کو پی ٹی آئی کے دھرنے کی کال نے بھی بے یقینی پیدا کردی ، اسٹیبلشمنٹ ڈویژن نے گریڈ 20 اور 21 میں ترقی دینے کیلئے سنٹرل سلیکشن بورڈ کا 3 روزہ اجلاس 25، 26 اور 27 نومبر کو طلب کیا ہےجس کی صدارت چیئر مین وفاقی پبلک سروس کمیشن لیفٹنٹ جنرل (ر) اختر نواز ستی کریں گے۔سنٹرل سلیکشن بورڈ کا اجلاس گزشتہ 14 ماہ سے زیرِ التواء چلا آرہاتھا۔سنٹرل سلیکشن بورڈکا آخری اجلاس اگست 2023 میں ہوا تھا۔ ۔اجلاس میں گریڈ انیس اور بیس کے سات سو سے زائد افسروں کو اگلے گریڈ میں ترقی دی جا ئے گی۔ اجلاس کی طلبی کا نو ٹیفیکیشن 30اکتوبر کو جاری کیا گیا تھا ۔ اجلاس میں صرف ایک ہفتہ باقی رہ گیا ہے لیکن ابھی تک وزیر اعظم نے سنٹرل سلیکشن بورڈ کی تشکیل نو کی منظوری نہیں دی ۔ دو سری جانب پی ٹی آئی نے 24نومبر کو اسلام آ باد میںدھرنے کی کال دیدی ہے ۔