سانحہ پاراچنار ملکی سالمیت اور وقار پرحملہ ہے‘ علامہ شبیر میثمی

اسلام آباد (اپنے نامہ نگار سے) شیعہ علماء کونسل پاکستان کے مرکزی سیکرٹری جنرل علامہ ڈاکٹر شبیر حسن میثمی نے کہا ہے کہ سانحہ پارا چنار ملکی سالمیت اور وقار پر حملہ ہے۔ امن وامان کے ضامن اداروں کے محاصرے میں پارا چنار کی مظلوم عوام کا قتل عام سوالیہ نشان ہے۔ حمایت مظلومین پارا چنار ریلی سے خطاب کرتے ہوئے انہوں نے کہا معصوم شیر خوار بچوں، خواتین اور نہتے افراد پر سفاکانہ حملہ دہشت گردوں کی بزدلانہ کارروائی ہے۔ اس دردناک گھڑی میں ہم شہداء پارا چنار کے مظلوم ورثاء کے ساتھ برابر کے شریک ہیں۔ آخر پارا چنار سے پشاور جانے والے مسافروں کا کیا قصور تھا؟ چالیس روز سے محصور پرامن شہری انتہائی مجبوری کے عالم میں کانوائے کے ساتھ سفر کر رہے تھے۔ ریاست کہاں ہے۔ ڈاکٹر شبیر حسن میثمی نے کہا کہ کے پی حکومت مکمل ناکام ہو چکی ہے‘ ایسے لگتا ہے عوام کے جان ومال کا تحفظ صوبائی ترجیحات میں شامل ہی نہیں اور انہیں مٹھی بھر دہشت گردوں کے رحم و کرم پر چھوڑ دیا گیا ہے۔ انہوں نے مطالبہ کیا کہ قاتلوں کو اُنکے منطقی انجام تک پہنچایا جائے اور پارا چنار تا پشاور قومی شاہراہ کو محفوظ بنانے کا مستقل اور پائیدار بنیادوں پر حل نکالا جائے تاکہ عوام کی آمدورفت بلاخوف و خطر ہوسکے۔