PTIاحتجاج ختم ، سٹاک مارکیٹ انڈیکس 4695پوائنٹ بڑھ گیا

لاہور (سودی) ایک دن قبل کے شدید مندے کے بعد گزشتہ روز سٹاک مارکیٹ میں زبردست تیزی کا رجحان رہا۔ جس کے نتیجہ میں ساڑھے تین سو سے زائد کمپنیوں کے حصص کی قیمتوں میں اضافہ سمیت انڈیکس اور مجموعی مالیت بھی بڑھ گئی۔ مارکیٹ میں کاروبار کا آغاز ہی تیزی سے ہوا جس میں شدت آتی رہی اور ایک موقع پر انڈیکس 4975 پوائنٹ تک بڑھ گیا جو ایک ہی روز میں اضافہ کا نیا ریکارڈ ہے۔ ایک روز قبل کے مقابلہ میں کاروباری حجم کم تھا زیادہ سرگرمی بینک آٹو اور فرٹیلائزر سیکٹر میں تھی۔ گزشتہ روز بینکوں، بیرونی اداروں اور بروکروں نے سیل اور پرافٹ ٹیکنگ کر لی جبکہ مقامی نجی سرمایہ کاروں، کمپنیوں، انشورنس سیکٹر اور میوچل فنڈز کی نیٹ خریداری تھی۔ مارکیٹ میں تیزی کا باعث بننے والے عناصر میں پی ٹی آئی کا احتجاج ختم ہونے کے بعد حالات نارمل ہونا سرفہرست تھا اسی طرح بینکوں پر اضافی ٹیکس سے متعلق مثبت پیش رفت کی خبریں، سرمایہ کاروں کی طرف سے خریداری کی نئی پوزیشن لینا، سیمنٹ کی برآمدات میں اضافہ، کھاد کی سیل بڑھنا تیزی کا باعث تھے۔ اختتام پر انڈیکس 4695 پوائنٹ اضافہ سے 99269پر آگیا۔ 356 کمپنیوں میں اضافہ 52میں کمی، 45میں استحکام رہا۔ 10کروڑ 57لاکھ حصص کا کاروبار ہوا۔