مالی سال کے پہلے 4ماہ میں توقعات سے زیادہ معاشی بحالی ہوئی ، وفاقی حکومت

اسلام آباد(آئی این پی)وفاقی حکومت نے کہا ہے کہ رواں مالی سال کے پہلے چار ماہ(جولائی تا اکتوبر) کے دوران توقعات سے زیادہ معاشی بحالی ہوئی ہے۔رواں مالی سال کے پہلے چار ماہ (جولائی تا اکتوبر)میں مہنگائی کی شرح 8.7 فیصد رہی ہے جبکہ رواں ماہ(نومبر)مہنگائی کی شرح 5.6 فیصد رہنے کی توقع ہے جبکہ آئندہ ماہ (دسمبر) مہنگائی کی شرح 6.5 فیصد کی شرح پر آسکتی ہے، ۔وزارت خزانہ کی جانب سے جاری کردہ ماہانہ اقتصادی آٹ لک رپورٹ میں دعوی ٰکیا گیا ہے کہ رواں مالی سال کے دوران پائیدار معاشی بحالی کا عمل جاری ہے، شرح سود اور مہنگائی میں کمی جبکہ برآمدات اور ترسیلات زر میں اضافہ ریکارڈ کیا گیا۔ زرمبادلہ ذخائر، روپے کی قدر، سرمایہ کاری اور ٹیکس ریونیو میں بہتری آئی ہے۔رپورٹ کے مطابق چار ماہ میں ٹیکسٹائل اور آٹو انڈسٹری کی پیداوار میں اضافہ ریکارڈ کیا گیا، کاروں کی پیداوار 51 فیصد، ٹرک اور بسیں 80 فیصد، جیپوں کی پیداوار 55 فیصد بڑھی جبکہ ٹریکٹرز کی پیداوار میں 54.2 فیصد کمی ریکارڈ کی گئی۔وزارت خزانہ کا کہنا ہے کہ آئندہ مہینوں میں معاشی سرگرمیوں میں اضافے کا امکان ہے۔