پی ٹی آئی کا مظاہرین پر تشدد کی عدالتی انکوائری کرانے کا مطالبہ،خیبر پختونخوا میں ممکنہ گورنر راج مسترد

پشاور(جنگ نیوز،صباح نیوز)قومی اسمبلی میں اپوزیشن لیڈر و رہنما تحریک انصاف نے کہاہے کہ اسلام آباد میں مظاہرین تشدد کی عدالتی انکوائری کرائی جائے، خیبرپختونخوا میں ممکنہ گورنر راج کو مسترد کرتے ہیں، پارٹی قیادت میں تبدیلی کی خبریں قیاس آرائیاں ہیں، شہدا کے غم میں برابر کے شریک ہیں، حقائق سامنے لانے کیلئے وزیر اعظم کمیٹی بنائیں،آئین سیکورٹی فورسز کو نہتے عوام پر فائرنگ کی اجازت نہیں دیتا، کنٹینر سے نمازی کو گرانے والے اہلکار کو مثالی سزا دی جائے۔ جیونیوز کے مطابق پی ٹی آئی رہنما عمرایوب نے چیف جسٹس پاکستان سے اسلام آباد میں مظاہرین پر تشدد کی جوڈیشل انکوائری کرانے کا مطالبہ کرتے ہوئے کہا کہ ڈی چوک پر پُر امن مظاہرین کو شہید کیا گیا، اس معاملے کی مکمل جوڈیشل انکوائری کرائی جائے۔ڈی چوک پر آپریشن شروع ہونے کے بعد پارٹی قیادت کے بھاگنے کے سوال پر عمرایوب نے کہا کہ میں، امین گنڈاپور اور بشریٰ بی بی آخری لمحات تک اسلام آباد میں موجود تھے مگر اسنائپرز کی جانب سے فائرنگ شروع ہونے کے بعد واپس جانے کا فیصلہ کیا گیا۔ صباح نیوز کے مطابق عدالت میں کیس کی سماعت کے موقع پر میڈیا سے بات چیت کرتے ہوئے انہوں نے کہا کہ ہم پر بوگس کیسز بنائے گئے ہیں۔ ہم پر موٹر سائیکل چوری کے کیسز بھی بنا دیئے گئے ہیں۔ ہم پی ٹی آئی شہدا کے غم میں برابر کے شریک ہیں۔ زخمیوں اور شہدا کے اہل خانہ کیلئے مالی معاونت کا اعلان کردیا گیا ہے۔ حقائق سامنے لانے کیلئے وزیراعظم کمیٹی بنائیں۔ انہوں نے کہا کہ علی امین گنڈا پور کو خراج تحسین پیش کرتا ہوں، وہ ایک گھنٹہ بھی نہیں سوئے۔ انہوں نے کہا کہ ہمارے پرامن احتجاج کے سامنے رکاوٹیں کھڑی کی گئیں۔ وزیر اعلیٰ نے کہا کہ ریڈ زون میں نہیں جانا پر امن رہنا ہے۔ عمر ایوب نے دعویٰ کیا کہ مجھ پر قاتلانہ حملہ ہوا ہے۔ اپوزیشن لیڈر پر قاتلانہ حملہ آئی جی اسلام آباد اور وفاقی حکومت نے کیا۔ چیف جسٹس فیکٹ فائنڈنگ کمیٹی بنائیں، جوڈیشل انکوائری کا اعلان کریں۔ انہوں نے کہا کہ ہری پور میں 3 سو سے زیادہ رینجرز اہلکار آئے تھے۔ کے پی کے کی سرزمین پر بغیر اجازت کیسے رینجرز اہلکار آئے، سیکورٹی فورسز کو نہتے عوام پر فائرنگ کی اجازت آئین نہیں دیتا۔ سنائپر ڈی چوک میں استعمال ہوا، دہشت گردوں کیخلاف استعمال ہونے والا اسلحہ عام شہریوں کیخلاف استعمال کیا گیا۔ امریکہ کا دیا گیا اسلحہ استعمال ہوا، خود کار اسلحہ کیسے استعمال کیا گیا اس کی تحقیقات ہوں گی۔ انہوں نے کہا کہ جس طرح کنٹینر پر نماز پڑھتے ہوئے بندے کو گرا یا گیا ایسے کہاں پر ہوتا ہے وہاں پر تعینات اہلکاروں کا کورٹ مارشل کیا جائے جس نے کنٹینر سے نمازی کو گرایا، اسے مثالی سزا دی جائے۔ انہوں نے کہا کہ نیب ٹیم یہاں آنے کے بجائے نوازشریف اور مریم نواز کے پیچھے جائے۔ نیب اور ایف آئی اے سوئے ہوئے ہیں، جاکر ان سے لوٹا گیا مال نکالیں۔ انہوں نے کہا کہ بشریٰ بی بی کو سیاست سے دور رکھنے کا مشورہ کسی نہیں دیا، خیبرپختونخوا میں گورنر راج قابل قبول نہیں، پی ٹی آئی کے تمام فیصلے بانی پی ٹی آئی ہی کرتے ہیں، پارٹی قیادت میں تبدیلی کی خبریں قیاس آرائیاں ہیں۔