لاہور میں جمعہ، ہفتہ اور اتوارکو ہرقسم کی ہیوی ٹریفک کےداخلے پر پابندی برقرار

لاہور(نمائندہ جنگ) صوبائی دارالحکومت میں جمعہ، ہفتہ اور اتوارکو ہرقسم کی ہیوی ٹریفک کے شہر میں داخلے پر پابندی لگا دی گئی۔تفصیلات کے مطابق گزشتہ روز آج اور اتوار کو کسی بھی قسم کی ہیوی ٹریفک، لوڈر ٹریکٹر ٹرالی کو شہر میں داخلے کی اجازت نہیں دی گئی۔ پابندی کو یقینی بنانے کےلئے ڈی ایس پیز کی نگرانی میں شہر کے 12 داخلی و خارجی راستوں پر نفری تعینات کی گئی ہے۔ہیوی ٹریفک، خستہ حال، کالادھواں چھوڑنے و فٹنس سرٹیفکیٹ نہ رکھنےوالی گاڑیوں کواجازت نہیں البتہ پابندی سےمستثنیٰ پٹرول، ادویات، خورونوش ومسافر گاڑیوں کوچیکنگ کےبعد داخلے کی اجازت ہے۔محکمہ ٹرانسپورٹ پنجاب کے حکام نے بتایا پابندی کے اطلاق کو 100 فیصد یقینی بنایا جا رہا ہے،ٹرانسپورٹرز سموگ تدارک وصحتمندآب وہوا کیلئےحکومتی احکامات کی پاسداری کریں، ماحولیاتی آلودگی کے خاتمے کیلئے ہم سب کو مل کر کوشش کرنا ہوگی۔دھواں چھوڑنے والی گاڑیوں کیخلاف ہیوی کریک ڈاؤن جاری ہے،روزانہ لاکھوں کےجرمانے اور سینکڑوں گاڑیوں کو بند کروایا جا رہا ہے۔شہر میں 41 انسدادِ سموگ سکواڈز بھی تشکیل دیے گئے ہیں۔