کشمیریوں پرجاری بھارتی مظالم بے نقاب کرنے کیلئے موثر آواز بلند کی جائے گی،بیرسٹرسلطان

اسلام آباد (اے پی پی) صدر آزاد کشمیر بیرسٹر سلطان محمود چوہدری نے کہا ہے کہ کشمیر یوں پر جاری بھارتی مظالم بے نقاب کرنے کیلئے موثر آواز بلند کی جائے گی جبکہ صدر مسلم لیگ ن شاہ غلام قادر نے کہا ہے کہ بھارت نے طاقت کے زور پر کشمیریوں کا حق خودارادیت چھین لیا، یہ اقوام متحدہ کی قراردادوں کے منافی ہے۔تفصیلات کے مطابق صدر بیرسٹر سلطان سے صدر مسلم لیگ ن آزادکشمیر وسابق سپیکر شاہ غلام قادر نے ایوان صدر کشمیر ہاؤس، اسلام آباد میں ملاقات کی۔ اس موقع پر بیرسٹر سلطان اور شاہ غلام قادر کے درمیان مسئلہ کشمیر اور مقبوضہ کشمیر میں جاری بھارتی مظالم پر تفصیلی بات چیت ہوئی جبکہ آزاد کشمیر کی سیاسی صورتحال سمیت مختلف امور پر تبادلہ خیالات کیا گیا،صدر نے کہا کہ اندرون و بیرون ملک مسئلہ کشمیر کے حل اور مقبوضہ کشمیر میں جاری بھارتی مظالم کوبے نقاب کرنے کیلئے بھرپور انداز میں آواز بلند کی جائے گی آزادکشمیر کی تمام سیاسی جماعتیں متحد ہو کر تمام فورمز پر بھارت کے ظالمانہ اور گھناؤنے چہرے کوبے نقاب کریں۔ شاہ غلام قادر نے کہا کہ بھارت نے مظلوم کشمیریوں سے جینے کا حق اور طاقت کے زور پر اُن سے حق خودارادیت چھین رکھا ہے جو کہ کشمیر پر اقوام متحدہ کی قراردادوں کے منافی ہے۔ ملاقات میں بیرسٹر سلطان اور شاہ غلام قادر کے درمیان آزادکشمیر کی سیاسی صورتحال پر تفصیلی بات چیت ہوئی جبکہ باہمی دلچسپی سمیت دیگر امور پر بھی تبادلہ خیال کیا گیا۔ اس موقع پر ملاقات میں سابق وزیر حکومت راجہ یاسین اور سابق ممبر کشمیر کونسل سردار نسیم سرفراز بھی موجود تھے۔