درینگڑھ واقعہ : لیویز اہلکاروں کو شہید قرار دیا جائے ، اہلخانہ

کوئٹہ(اسٹاف رپورٹر) درینگڑھ میں شہید ہونیوالے لیویز اہلکاروں کے اہلخانہ ڈاکٹر محمد بخش ، وڈیرہ اللہ بخش محمد شہی ، سرفراز ببری ، محمد یعقوب بنگلزئی و دیگر نے کہا ہے کہ حکومت کی جانب سے ہمارے شہداء کو تاحال سرکاری طور پر شہید قرار نہیں دیا گیا اور نہ ہی اس حوالے سے اب تک کوئی سنجیدہ قدم اٹھایا گیا ہے ، ہم آج بھی انصاف کے منتظر ہیں ۔ یہ بات انہوں نے جمعرات کو کوئٹہ پریس کلب میں پریس کانفرنس میں کہی ۔ انہوں نے کہا کہ 13 ستمبر کو درینگڑھ کے مقام پر بھتہ خوروں کی فائرنگ سے شہید ہونیوالے لیویز اہلکاروں مزار جان مینگل اور وڈیرہ اللہ بخش محمد شہی کو حکومت کی جانب سے تاحال سرکاری طور پر شہید ڈکلیئر نہیں کیا اور نہ ہی اس سلسلے میں کوئی سنجیدہ قدم اٹھایا گیا ہے ۔ انہوں نے مطالبہ کیا کہ گزشتہ ڈھائی ماہ سے سرد خانے میں پڑے اس کیس کو فوری طور پر سی ٹی ڈی کے حوالے کیا جائے تاکہ انصاف کے تقاضے پورے ہوں۔ انہوں نے کہا کہ شہید اور زخمی لیویز اہلکاروں کا سرکاری اسلحہ بھی اب تک برآمد نہیں کیا گیا ، انہوں نے کہا کہ لیویز اہلکاروں کو شہید کرنے کے بعد ان کی لاشوں کی مبینہ طور پر بے حرمتی کی گئی جبکہ واقعہ میں ملوث عناصر آج بھی سرعام گھوم رہے ہیں ، درینگڑھ واقعے میں 2 لیویز اہلکار شہید جبکہ ایس ایچ او حاجی ایاز محمد شہی سمیت 3 اہلکار زخمی ہوئے تھے ۔ انہوں نے حکومت سے مطالبہ کیا کہ ہمیں انصاف فراہم کرنے کے لئے فوری اقدامات اٹھائے جائیں۔