قائمہ کمیٹی برائے کھیل کا اجلاس،ڈائریکٹر جنرل کھیل نے کمیٹی کو بریفنگ دی

کوئٹہ(اسٹاف رپورٹر) قائمہ کمیٹی برائے کھیل کا اجلاس چیئرمین رحمت صالح بلوچ کی صدارت میں ہواجس میںڈاکٹر محمد نواز کبزئی، سنجے کمار، صفیہ بی بی، سیکرٹری اسمبلی طاہر شاہ کاکڑ، اسپیشل سیکرٹری عبدالرحمن ،ڈی جی اسپورٹس یاسربازئی نے شرکت کی۔اجلاس مین ڈائریکٹر جنرل کھیل نے کمیٹی کو محکمے کی فرائض و ذمہ داریوں اور چیلنجوں کے بارے میں بریفنگ دی۔کمیٹی کو آگاہ کیا گیا کہ 2024-25 میں کھیل کے شعبے میں 37 نئی اسکیمیں جاری ہیں ، جن کی مجموعی لاگت 1385.560 ملین روپے ہے ۔ مزید برآں 95 جاری اسکیموں کی مجموعی لاگت 17611.832 ملین روپے ہے جبکہ اس وقت محکمہ 25 سپورٹس کمپلیکس کے منصوبوں پر بھی کام کررہا ہے ۔ محکمے کے مسائل پیش کرتے ہوئے انہوں کہا کہ اس وقت محکمے کو انکروچمنٹ ، ناکافی بجٹ اور گاڑیاں تحویل میں لے کر اسپورٹس کمپلیکس میں کھڑی کیے جانے سے مسائل کا سامنا ہے ، جبکہ کمیٹی کو بتایا گیا کہ محکمے کو منصوبوں کو موثر طریقے سے انجام دینے کے لیے انجینئرنگ ونگ جس میں کھیلوں سے متعلق مہارت رکھنے والوں کی ضرورت ہے ۔ چیئرمین کمیٹی رحمت صالح بلوچ نے محکمہ کو یقین دلایا کہ کمیٹی انجینئرنگ ونگ کے قیام میں مدد کرے گی ۔ کمیٹی نےگرانٹ ان ایڈ کو 300 ملین سے 500 ملین رکھنے کی سفارش کی تاکہ محکمہ اپنے مالی چیلنجوں سے آسانی سے نمٹ سکے ۔ اجلاس میں بین الاقوامی سطح پر ملک کی نمائندگی کرنے والے کھلاڑیوں کی حوصلہ افزائی کی ضرورت پر بھی تبادلہ خیال کیا گیا جبکہ کمیٹی نے ضلع ، ڈویژنل ، صوبائی اور قومی سطح پر نوجوانوں کی حوصلہ افزائی کے لیے کھیلوں کے بجٹ میں اضافے کی بھی سفارش کی ۔کمیٹی نے فیصلہ کیا کہ اجلاس کی تمام سفارشات کو ایوان میں پیش کیا جائے گا۔کمیٹی نے امتحانات کے انعقاد جیسی غیر متعلقہ سرگرمیوں کے لیے اسپورٹس کمپلیکس کے استعمال پر تشویش کا اظہار کیا۔چیئرمین رحمت صالح بلوچ نے محکمہ کو ہدایت کی کہ وہ جاگنگ، واک اور کھیلوں کے دیگر سرگرمیوں کے لئے نوجوانوں، خواتین اورسنیئر سٹیزنز کو اچھا ماحول اور بہترین سہولیات فراہم کرے نہ کے کھیلوں سے ہٹ کر کسی دیگر سرگرمی کے لئے اسپورٹس کمپلیکس کو کئی دنوں تک بند رکھے۔