عافیہ صدیقی کیس؛ سمری وزیراعظم تک جلد پہنچانے کیلئے اس پر پی ٹی آئی لکھ دیں، جج

اسلام آباد (خبر نگار) اسلام آباد ہائیکورٹ نے عافیہ صدیقی کیس میں وزارت خارجہ کو ہدایت کی کہ وہ امریکہ جانے والے وفد کے اخراجات کے معاملے پر وزیر اعظم کو سمری ارسال کرے تاکہ فیصلہ کیا جا سکے کہ اخراجات حکومت برداشت کرے گی یا نہیں۔دوران سماعت جسٹس سردار اعجاز اسحاق نے مسکراتے ہوئے ریمارکس دئیے کہ اگر سمری وزیر اعظم تک نہیں پہنچتی تو اس پر پی ٹی آئی لکھ دیں ، جلدی پہنچ جائے گی۔ عمران شفیق ایڈووکیٹ نے کہاکہ حکومت کی طرف سے وفد میں کوئی نہیں تھا ، پہلے انوشہ رحمن کا بتایاگیا اب وہ نہیں جا رہیں ، پھر عرفان صدیقی کا بتایا گیالیکن اب پتہ چلا ہے وہ بھی نہیں ہیں ، ویزا ابھی نہیں ہوا ، آفیشل ویزا چاہئے۔ ڈاکٹر عافیہ کے وکیل کلائیو سمتھ کی ویڈیو لنک کے ذریعے پیشی کے دوران انٹرنیٹ کی سست روی کے باعث آواز سنائی نہ دینے پر ۔ فاضل جسٹس نے ریمارکس دئیے کہ اب کیا پی ٹی اے کو نوٹس کردوں کہ عدالت میں بھی انٹرنیٹ صحیح کام نہیں کر رہا؟ جسٹس سردار اعجاز نے امریکی وکیل سمتھ سے استفسار کیاکہ سابقہ ڈکلیریشن سے متعلق بتائیں کیا پوزیشن ہے؟ ا سمتھ نے کہا کہ اس موقع پر دورہ کی کامیابی کے زیادہ امکانات ہیں ، عدالت نے چیئرمین پی ٹی اے سے وضاحت طلب کر تےہوئے سماعت پیر تک ملتوی کر دی۔