شام، ترک حمایت یافتہ جنگجو پھر حلب میں داخل، شامی فوج سے لڑائی، 255 ہلاک

کراچی ، بیروت، استنبول (نیوز ڈیسک، اے ایف پی) شام میں باغیوں اور ترک حمایت یافتہ جنگجو ایک بار پھر حلب شہر میں داخل ہوگئے ،شامی فوج سے شدید لڑائی ، 255افراد ہلاک ہوگئے ۔ شام میں جنگ کی صورتحال پر نظر رکھنی والی مبصر تنظیم سیرین آبزیروٹری کا کہنا ہے کہ شامی باغیوں نے حلب کے پانچ اضلاع کا کنٹرول حاصل کرلیا ہے جبکہ شامی فوج کا کہنا ہے کہ انہوں نے ترک حمایت یافتہ جنگجوئوں کا بڑا حملہ پسپا کرتے ہوئے ان کے قبضہ کئے گئے علاقوں کا کنٹرول دوبارہ حاصل کرلیا ہے ۔ترکیہ نے شام میں باغیوں کے علاقے ادلب پر "حملوں" کو بند کرنے کا مطالبہ کیا ہے، جہاں شامی اور روسی لڑاکا طیاروں نے مبینہ طور پر فضائی حملے کئے ہیں ۔ ترک وزارت خارجہ نے ایکس پر ایک پیغام میں کہا کہ ہم نے اس بات پر زور دیا ہے کہ ان حملوں کا خاتمہ ہونا چاہیے۔حالیہ جھڑپوں کے نتیجے میں خطے میں ناپسندیدہ کشیدگی میں اضافہ ہوا ہے۔تفصیلات کے مطابق سیرین آبزرویٹری فار ہیومن رائٹس کے سربراہ رامی عبدالرحمن نے اے ایف پی کو بتایا کہ حیات تحریر الشام (ایچ ٹی ایس) اور اس کے اتحادی دھڑوں کا "حلب شہر کے پانچ علاقوں پر کنٹرول ہے"، انہوں نے مزید بتایا کہ حکومتی فورسز کی جانب سے کسی خاص مزاحمت کے بغیر پیش قدمی کی گئی ہے، یہ پیش قدمی برسوں بعد باغیوں کے سب سے بڑے حملے کے چند دن بعد ہوئی ہے ۔شامی فوج نے ایک بیان میں بتایا ہے کہ ہماری افواج مسلح دہشت گرد گروپوں کی جانب سے شروع کی گئی بڑی کارروائی کو پسپا کررہی ہیں۔ فوج نے ایک بیان میں مزید کہا کہ وہ "کچھ پوزیشنوں پر دوبارہ کنٹرول حاصل کرنے میں کامیاب ہوگئی ہے۔