عمر ایوب کا چیف جسٹس سے مظاہرین پر تشدد کی جوڈیشل انکوائری کا مطالبہ

اسلام آباد (خبر نگار) پی ٹی آئی کے سینئر رہنما اور قومی اسمبلی میں اپوزیشن لیڈر عمر ایوب خان نے چیف جسٹس پاکستان سے اسلام آباد میں مظاہرین پر تشدد کی جوڈیشل انکوائری کرانے کا مطالبہ کر دیا۔ انہوں نے کہا کہ ڈی چوک پر پرامن مظاہرین کو شہید کیا گیا، اس معاملے کی مکمل جوڈیشل انکوائری کرائی جائے۔ عمر ایوب خان نے ڈی چوک پر آپریشن شروع ہونے کے بعد پارٹی قیادت کے بھاگنے کے سوال پر کہا کہ میں، علی امین گنڈاپور اور بشریٰ بی بی آخری لمحات تک اسلام آباد میں موجود تھے مگر اسنائپرز کی جانب سے فائرنگ شروع ہونے کے بعد واپس جانے کا فیصلہ کیا گیا۔ واضح رہے کہ تین روز قبل سکیورٹی فورسز نے اسلام آباد کو پی ٹی آئی مظاہرین سے خالی کرانے کیلئے آپریشن کیا تھا جس کے شروع ہوتے ہی وزیراعلیٰ کے پی علی امین گنڈاپور اور بشریٰ بی بی موقع سے فرار ہوگئے تھے۔ آپریشن کے باعث قیادت کے فرار ہونے پر کارکنان بھی وہاں سے بھاگ نکلے۔ بیشتر کارکنان اپنی گاڑیاں تک وہیں چھوڑ آئے۔