سعودی عرب میں 19ہزار سے زائدغیر قانونی تارکین وطن گرفتار

جدہ (صباح نیوز) سعودی عرب میں غیر قانونی تارکین کیخلاف کام کرنے والی مشترکہ کمیٹی نے گزشتہ ہفتے 19ہزار 24 غیر قانونی تارکین وطن کو گرفتار کیا۔ غیر قانونی تارکین کے خلاف کام کرنے والی مشترکہ کمیٹی کی جانب سے جاری بیان میں کہا گیا ہے کہ گزشتہ ہفتے گرفتار کئے گئے 19ہزار سے زائد غیر قانونی تارکین میں سے 11ہزار 268 اقامہ قوانین کی خلاف ورزی پر گرفتار کئے گئے۔ ان میں سے 4773 افراد سرحدی قوانین کی خلاف ورزی جبکہ 2983 تارکین لیبر قوانین کی خلاف ورزی میں ملوث تھے۔ مذکورہ عرصے کے دوران 1212 افراد گرفتار کئے جو سرحد عبور کر کے ملک میں غیر قانونی طور پر داخل ہونے کی کوشش کر رہے تھے جن میں سے 25 فیصد یمنی، 73 فیصد ایتھوپین جبکہ دو فیصد دیگر ممالک کے تارکین تھے۔ اسی طرح سرحد عبور کرکے غیر قانونی طور پر ملک سے باہر جانے کی کوشش کرتے ہوئے 122 افراد گرفتار ہوئے ہیں۔ کمیٹی نے کہا کہ غیر قانونی تارکین کو سہولت فراہم کرنے پر 21 افراد بھی گرفتار کئے گئے۔