دو ارب لاگت کے گورنمنٹ کالج یونیورسٹی فیصل آبادچنیوٹ کیمپس کا افتتاح رواں ماہ

اسلام آباد( رپورٹ حنیف خالد) وفاقی وزیر بحری امور قیصر احمد شیخ نے چنیوٹ میں اپنے دفتر میں ایک کھلی کچہری منعقد کی جس میں واپڈا، سوئی ناردرن گیس، پولیس، بلدیہ،پاکستان ریلوے اور دیگر وفاقی اور صوبائی محکموں کے افسران نے شرکت کی۔ اس موقع پر شہریوں نے اپنے مسائل وفاقی وزیر کے سامنے پیش کئے جن کے حل کیلئے انہوں نے احکامات جاری کئے۔قیصر احمد شیخ نے شادی کے تحفہ کے طور پر خواتین میں سلائی مشینیں تقسیم اورمستحق مریضوں کو مفت ادویات فراہم کی گئیں ۔ انہوں نے چنیوٹ شہر میں دو نئے پارکوں کا سنگ بنیاد رکھا۔ ان پارکوں میں "فاطمہ لیڈیز پارک" (محلہ مشکی شاہ) اور "عرفان قیصر شیخ پارک" (نزد لاری اڈہ چنیوٹ) شامل ہیں۔ سنگ بنیاد کی تقریب میں ڈپٹی کمشنر چنیوٹ صفی اللہ گوندل، مختلف محکموں کے افسران اور شہریوں کی بڑی تعداد نے شرکت کی۔وائس چانسلر جی سی یو فیصل آباد ڈاکٹر رؤف اعظم نے بھی وفاقی وزیرسے ملاقات کی جس میں 2 ارب روپے کی لاگت سے تیار ہونے والے جی سی یو ایف چنیوٹ کیمپس کے افتتاح پر بات چیت ہوئی جس کا افتتاح اسی ماہ کیا جائے گا ۔