وزیر اعلیٰ مریم کی زیر صدارت اجلاس، مہنگائی،تجاوزات کے خاتمہ کیلئے قائم’’ PIRA‘‘کو 3ماہ میں فنکشنل کر نے کی منظوری

لاہور(خصوصی نمائندہ)وزیر اعلیٰ مریم نوازشریف کی زیر صدارت پنجاب انفورسمنٹ اینڈ ریگولیٹری اتھارٹی کا پہلا باضابطہ اجلاس منعقد ہوا ۔اجلاس میں پیرا دفاتر کے قیام، تعیناتی، قواعد وضوابط اور دیگر امور ،4 کمیٹیوں ایڈمنسٹریشن لا جسٹک کمیٹی، فنانس کمیٹی، لیگل کمیٹی اور ٹیکینکل کمیٹی کے قیام کی منظوری دی گئی۔وزیراعلیٰ نے پیرامیں تعیناتیاں، ہائرنگ کے لئے شفافیت اور میرٹ یقینی بنانے ، مانیٹرنگ کاموثر نظام وضع کرنے کی ہدایت کی ، پیرا کو3ماہ میں فنکشنل کرنے کا ٹارگٹ مقرر کیا، ہر تحصیل میں سب ڈویژنل انفورسٹمنٹ آفیسر، انویسٹی گیشن آفیسر، سینئر سارجنٹ اور سارجنٹ تعینات کرنے ،پیرا سٹاف کے ٹرانسفر اور ڈیپوٹیشن پالیسی انفورسمنٹ سٹیشن پر اپیل کے لئے ہیئرنگ آفیسر مقرر کرنے کی ،پرکیورمنٹ پلان اور ڈی جی پیرا کے اختیارات کے تعین، پیرا کی گاڑیوں، یونیفارم،کیپ کے کلر اور برانڈنگ کی منظوری دی گئی، پیرا کے آپریشن، پروسیجر، اینڈ ریگولیشن 2024کا جائزہ لینے کے لئے خصوصی کمیٹی قائم کی جائے گی،وزیراعلیٰ پنجاب نے متحدہ عرب امارات کے عوام کو53ویں قومی دن پر مبارکباد پیش کرتے ہوئے کہاکہ متحدہ عرب امارات سے پاکستان کے تعلقات کئی دہائیوں پر محیط ہیں۔ امارات دنیا بھر میں جدت اور ترقی کی قابل تقلید مثال ہے ، آزمائش کی ہر گھڑی میں پاکستان کا پورا ساتھ دیا ہے اقتصادی اورسفارتی حمایت کو قدر کی نگاہ سے دیکھتے ہیں۔ امارات پاکستانیوں کا دوسرا گھر ہے،دونوں ممالک کے عوام کے دل ایک ساتھ دھڑکتے ہیں۔ امارات کی مزید ترقی اور استحکام کے لیے دعا گو ہوں۔ وزیراعلیٰ نے دی نیشن کے ایڈیٹر سلمان مسعود کے والد گرامی مسعود احمد کے انتقال پر اہل خانہ سے تعزیت وہمدردی کا اظہار کیا ہے۔