رینج روڈ پر گڑھے سڑک تباہ حالی کا شکار

راولپنڈی (خبر نگار خصوصی ) راولپنڈی کینٹ بورڈ کے علاقہ رینج روڈ کی سڑک تباہ حالی کا شکار ہو گئی۔ جگہ جگہ گڑھوں سے ٹریفک کا نظام بھی بری طرح متاثر ہونے لگا جبکہ حادثات بھی معمول بن گئے۔ رینج روڈ پر صبح سے رات گئے تک شہری خریداری کی غرض سے آتے ہیں جبکہ ملازمت پیشہ افراد صدر اور اسلام آباد جانے کیلئے اسی مین سڑک کا استعمال کرتے ہیں جو ٹریفک جام سے بری طرح متاثر ہوتے ہیں۔ رینج روڈ پر موجود بعض سروس اسٹیشنوں کا ناقص سیوریج نظام بھی سڑک کی تباہی کا باعث بن رہا ہے۔ عوامی حلقوں نے کینٹ بورڈ حکام سے فوری اصلاح احوال کا مطالبہ کیا۔