اسلام آباد ہائیکورٹ،سزائے موت پانیوالے5نیول اہلکاروں کے وکیل کوریکارڈ تک رسائی دینے کی ہدایت

اسلام آباد (خبر نگار) اسلام آباد ہائیکورٹ نے سزائے موت پانیوالے پاک بحریہ کے 5افسران کے وکیل کو 9 دسمبر کو مجرمان کی انکوائری رپورٹ کے ریکارڈ تک رسائی دینے کا حکم دیدیا، جسٹس بابر ستار نے کہا ایڈیشنل اٹارنی جنرل کی موجودگی میں وکیل کو متعلقہ رپورٹ تک رسائی دی جائے انکوائری کی بنیاد پر سفارشات فراہم نہ کریں ، درخواست گزار وکیل کرنل (ر) انعام الرحیم ، ایڈیشنل اٹارنی جنرل منور اقبال دوگل ، بحریہ کے حکام اور دیگر عدالت میں پیش ہوئے، بحریہ حکام نے کہا ہم نے ٹرائل کے دوران متعلقہ دستاویزات فراہم کردی تھیں بورڈ آف انکوائری رپورٹ قومی سلامتی متعلق ہے مکمل فراہم نہیں کر سکتے، ایڈیشنل اٹارنی جنرل نے کہا ملزمان سے متعلقہ ریکارڈ کے حصے تک رسائی دے سکتے ہیں نیول ہیڈ کوارٹرز میں ریکارڈ موجود ہے یہ وہاں آکر ریکارڈ دیکھ لیں، عدالت نے ایڈیشنل اٹارنی جنرل کو ہدایت کی آپ یقینی بنائینگے کہ انکو متعلقہ دستاویزات تک رسائی دی گئی ہے نوٹس لینے کیلئے مناسب وقت دیا جائے ایک تو انکوائری کی ہو گی اور دوسرا اسکی بنیاد پر سفارشات ہونگی انکوائری کی بنیاد پر سفارشات آپ فراہم نہ کریں، جسٹس بابر ستار نے استفسار کیا اگر وہ آپکی موجودگی میں انکوائری رپورٹ دیکھ لیں تو اس میں کیا مضائقہ ہے اس پربحریہ کے حکام نے کہا قومی سلامتی متعلق دستاویزات نہیں دکھا سکتے ، مجرموں سے متعلقہ ریکارڈ دکھا سکتے ہیں عدالت نے کہا فاضل وکیل کو 9 دسمبر کو صبح 10 بجے انکوائری رپورٹ کے متعلقہ ریکارڈ تک رسائی دی جائے۔