چیف جسٹس سے سپریم کورٹ بار کے عہدیداروں کی ملاقات،چیلنجز سے آگاہ کیا

اسلام آباد(جنگ رپورٹر)چیف جسٹس پاکستان، جسٹس یحیٰ آفریدی نے سپریم کورٹ بار ایسوسی ایشن کی اپیل پر تمام اقسام کی ضمانت کی درخواستیں دائر ہونے کے بعد جلد از جلد انہیں طے کرنے اورعبوری درخواستوں اور حکم امتناع کے معاملات سے متعلق مقدمات کی چیمبر سماعت کو بحال کرنے پر اتفاق کیا ہے، سوموار کے روز جاری سپریم کورٹ کے اعلامیہ کے مطابق سپریم کورٹ بار ایسوسی ایشن کے صدر میاں محمد رئوف عطا ء نے جنرل سیکرٹری سلمان منصور کے ہمراہ سپریم کورٹ میں چیف جسٹس سے ملاقات کے دوران انہیں انصاف کی موثر فراہمی کو یقینی بنانے میں قانونی برادری کو درپیش چیلنجز سے آگاہ کیا ہے ،جس پر چیف جسٹس نے ان کی اپیل کو کو قبول کرتے ہوئے تما م اقسام کی ضمانت کی درخواستیں دائر کرنے کے فورا بعد جلد طے کرنے پر اتفاق کیا جبکہ عبوری درخواستوں اورحکم امتناع کے معاملات کے حوالہ سے بھی مقدمات کی چیمبر سماعت بحال کرنے کی درخواست بھی منظور کرلی ،اعلامیہ کے مطابق چیف جسٹس نے عندیہ دیاہے کہ سپریم کورٹ کے نامزد کردہ جج سارا ہفتہ ہی چیمبر میں مقدمات کی سماعت بھی کریں گے، چیف جسٹس نے سپریم کورٹ بار کی لیڈر شپ کی استدعا پر اس عمل کو مزید تیز کرنے کے لیے ججوں کی تعداد بڑھانے پر بھی اتفاق کیا ،چیف جسٹس نے ان کی اس درخواست کو بھی منظور کیا کہ ویڈیو لنک سے متعلق تمام درخواستوں کو متعلقہ رجسٹریوں میں کیس کی سماعت کے دن ہی زیر غور لایا جائے گا