پاک بحریہ کے سابق سربراہ ایڈمرل یسطور الحق ملک انتقال کر گئے‘صدر، وزیراعظم کا اظہار افسوس

لاہور ، اسلام آباد(جنگ نیوز،نمائندہ خصوصی، نیوزرپورٹر) پاک بحریہ کے سابق سربراہ ایڈمرل یسطور الحق ملک لاہور میں انتقال کر گئے۔ایڈمرل یسطور الحق ملک نے 1954 میں پاک بحریہ میں کمیشن حاصل کیا، انہوں نے 1965 اور 1971 کی پاک بھارت جنگوں میں بھی حصہ لیا، ایڈمرل یسطور الحق ملک 1988 سے 1991 تک پاک بحریہ کے سربراہ رہے۔ صدر مملکت آصف علی زرداری اور وزیراعظم شہبازشریف نے سابق چیف آف نیول سٹاف ایڈمرل یسطور الحق ملک کی وفات پر گہرے دکھ اور افسوس کا اظہارکیا ہے۔ بدھ کو صدر مملکت نے ملکی دفاع اور سلامتی کیلئے مرحوم کی خدمات کو سراہا۔ صدر مملکت نے مرحوم کیلئے مغفرت اور لواحقین کیلئے صبر جمیل کی دعا کی۔ وزیراعظم نے سابق نیول چیف کی وفات پر افسوس کا اظہار کیا ہے۔ بدھ کو پی ایم آفس کے میڈیا ونگ سے جاری بیان کے مطابق وزیراعظم نے مرحوم کیلئے دعائے مغفرت کی۔ وزیراعظم نے مرحوم کے اہل خانہ کے لیے صبر و استقامت کی دعا ۔ وزیراعظم نے کہا کہ ایڈمرل یسطور الحق ملک کی ملکی دفاع اور سلامتی کےلئے خدمات ناقابل فراموش ہیں۔