ایاز صادق کے نظریئے کے تحت سندھ اسمبلی میں بھی ینگ پارلیمنٹرنز فورم قائم

اسلام آباد (طاہر خلیل) سیاسی کشیدگی میں کمی اور جعلی خبروں کی روک تھام کیلئے سندھ اسمبلی میں بھی ینگ پارلیمنٹرنز فورم قائم کر دیا گیا، سپیکر سندھ اسمبلی نے قومی اسمبلی کے سپیکر سردار ایاز صادق کے نظریئے کو سراہتے ہوئے سندھ اسمبلی میں وائی پی ایف کے قیام کا باضابطہ نوٹیفیکیشن جاری کر دیا۔ سپیکر قومی اسمبلی سردار ایاز صادق کے قومی اسمبلی میں ینگ پارلیمنٹیرین فورم کے قیام کے ویژن کو سراہتے ہوئے، صوبائی اسمبلی سندھ کے سپیکر سید اویس قادر شاہ نے ینگ پارلیمنٹیرین فورم کی سندھ اسمبلی میں برانچ کے قیام کا اعلان کیا۔ صوبائی اسمبلی سندھ کے اسپیکر نے وائی پی ایف کے قیام کا اعلان پر وائی پی ایف کی صدر سیدہ نوشین افتخار ایم این اے کی قیادت میں 17 رکنی کثیر الجماعتی وفد سے ہونے والی ملاقات کے موقع پر کیا۔ اس سلسلے میں سندھ اسمبلی سیکرٹریٹ کے نوٹیفیکیشن کے تحت وہ تمام ارکان اسمبلی جو انتخابات کے وقت 45 سال کی عمر تک تھے، سندھ اسمبلی کے وائی پی ایف کے رکن سمجھے جائیں گے۔