وزیراعظم کا دورہ سعودی عرب انتہائی اہمیت کا حامل رہا،وزیر اطلاعات

05 دسمبر ، 2024

اسلام آباد ( نمائندہ خصوصی)وفاقی وزیر اطلاعات عطاءاللہ تارڑ نے کہا ہے کہ وزیراعظم شہباز شریف کی زیر قیادت پاکستان کی کامیاب خارجہ پالیسی کی بدولت معاشی ترقی کا سفر جاری ہے، پاکستان اور سعودی عرب کے درمیان طے پانے والے معاہدے حقیقت کا روپ دھار رہے ہیں، سرمایہ کاری کا فروغ اور معاشی تعاون میں اضافہ حکومت کی اولین ترجیح ہے، وزیراعظم کا دورہ سعودی عرب انتہائی اہمیت کا حامل رہا،وزیراعظم کا دورہ سعودی عرب اور سعودی ولی عہد محمد بن سلمان کے ساتھ ملاقات انتہائی اہم رہے، پاک سعودی تعلقات نے ایک نیا موڑ لیا ۔بدھ کو وزیراعظم شہباز شریف کے حالیہ دورہ سعودی عرب کے حوالے سے گفتگو کرتے ہوئےانہوں نے کہا کہ مختصر عرصے میں پاکستان اور سعودی عرب کے درمیان تعلقات میں بہت زیادہ بہتری آئی ، دونوں ملکوں کے درمیان تعلقات مزید مضبوط ہوئے ہیں، سعودی عرب کے بڑے منصوبے پاکستان میں شروع ہو رہے ہیں، سعودی عرب کے ساتھ 28 ایم او یوز پر دستخط ہوئے تھے جن میں سے آٹھ منصوبوں پر کام شروع ہو چکا ۔انہوں نے کہا کہ وزیراعظم نے سعودی عرب میں واٹر سمٹ سے خطاب کیا اور فرانس کے صدر میکرون سے بھی ملاقات کی۔ انہوں نے کہا کہ وزیراعظم کی سرمایہ کاری پر بھرپور توجہ ہے، پی ٹی آئی حکومت کے دوران جہاں دوست ممالک کے ساتھ تعلقات خراب ہوئے وہاں ان کی معیشت پر بھی کوئی توجہ نہیں تھی۔ آج دنیا بھر کے رہنما ءپاکستان کی معاشی بحالی و ترقی کو سراہا رہے ہیں، دنیا بھر سے رہنما پاکستان آ رہے ہیں۔ انہوں نے کہا کہ سرمایہ کاری کا فروغ اور معاشی تعاون میں اضافہ حکومت کی اولین ترجیح ہے، آنے والے دنوں میں پاکستان میں مزید سرمایہ کاری آئے گی، روزگار پیدا ہوں گے، مہنگائی کم ہوگی، عوام کو ریلیف ملے گا۔