بے لگام آزادی اظہار، سخت قوانین ضروری، حکومت زہر اگلنے، معاشرتی تقسیم روکنے کیلئے ضوابط بنائے، جھوٹی خبریں پھیلانے والوں کو کٹہرے میں لائے، پاک فوج

راولپنڈی(نمائندہ جنگ )پاک فوج کی فارمیشن کمانڈر کانفرنس نےوفاقی دارالحکومت اسلام آباد میں اعلی سطح غیرملکی وفود کے تحفظ کے لئے پاک فوج کی تعیناتی پر کیے جانے والے بدنیتی پر مبنی پروپیگنڈے پر تشویش کا اظہار کرتے ہوئے کہاہے کہ یہ پروپیگنڈہ بعض سیاسی عناصر کے مذموم عزائم کے تسلسل کی عکاسی کرتا ہے‘پروپیگنڈے کا مقصد پاکستان کی عوام‘ مسلح افواج اور اداروں کے درمیان دراڑ پیدا کرنا ہے‘ایسی مذموم کوششیں کبھی کامیاب نہیں ہوں گی ‘ضروری ہے کہ حکومت بے لگام غیر اخلاقی آزادی اظہارِ رائے کی آڑ میں زہر اْگلنے‘ جھوٹ اور معاشرتی تقسیم کا بیج بونے کے خاتمے کیلئے سخت قوانین وضوابط بنائے اور ان پر عمل درآمد کرائے‘ سیاسی ومالی فوائد کی خاطر جعلی خبریں پھیلانے والوں کی نشاندہی کرکے انہیں انصاف کے کٹہرے میں لانا وقت کی اہم ضرورت ہے‘ ذاتی مفادات کے لیے معصوم شہریوں کو ایک دوسرے کے خلاف کھڑا کرنے اور تشدد کو ہتھیار کے طور پر استعمال کرنے کی کسی بھی کوشش کو ہرگز برداشت نہیں کیا جائے گا۔ فورم نے اقتصادی ترقی کو فروغ دینے‘غیر قانونی سرگرمیوں کے خلاف کریک ڈاؤن اور دہشت گردی اور جرائم کے گٹھ جوڑ کو ختم کرنے میں حکومتی کوششوں کی حمایت جاری رکھنے کا عزم کیا۔آئی ایس پی آر کے مطابق آرمی چیف جنرل سید عاصم منیرکی زیر صدرات جمعرات کو جی ایچ کیو میں دو روزہ 84ویں فارمیشن کمانڈرز کانفرنس منعقد ہوئی ۔اعلامیہ کے مطابق فورم نے بی ایل اے مجید بریگیڈ سمیت بلوچستان کے اندر سرگرم دہشت گردوں کے خلاف کارروائیوں پر توجہ مرکوز کرتے ہوئے پاکستان کو غیر مستحکم کرنے کے لیے دشمن قوتوں کی ایماء پر کام کرنے والے دہشت گردوں، ان کے سہولت کاروں اور ان کی حوصلہ افزائی کرنے والوں کو بے اثر کرنے کا عزم کیا۔ فورم نے عزم کیا کہ فوج قوم اور عوام کی خدمت کے لیے پرعزم ہے ۔ دہشت گردوں کی طرف سے پاکستان کے خلاف افغان سرزمین کے بے دریغ استعمال کو بھی تشویش کے ساتھ نوٹ کیا گیا۔ فورم نے زور دیا کہ یہ دونوں پڑوسی اسلامی ممالک کے مفاد میں ہے کہ وہ باہمی طور پر فائدہ مند روابط پر توجہ مرکوز کریں اور ہمسایہ ملک اپنی سرزمین کو پاکستان کے خلاف استعمال ہو نے سے روکے۔ فورم نے اس عزم کا اعادہ کیا کہ خیبرپختونخوا اور بلوچستان میں وفاقی اور صوبائی حکومتوں کی طرف سے شروع کی جانے والی تمام سماجی و اقتصادی اور ترقیاتی کوششوں کی حمایت جاری رکھیں گے ۔ فورم نے بھارت کے زیر تسلط مقبوضہ کشمیر میں جاری انسانی حقوق کی خلاف ورزیوں کی مذمت کی اور کشمیری عوام کے لیے پاکستان کی غیر متزلزل سیاسی، سفارتی اور اخلاقی حمایت کا اعادہ کیا۔ فورم نے فلسطینی عوام کے ساتھ یکجہتی کا اظہار کرتے ہوئے غزہ میں مظالم کی شدید مذمت کی اور فوجی جارحیت کے خاتمے کے لیے بین الاقوامی قانونی اقدامات کی حمایت کی۔