بلاول سے اسحاق ڈار،گورنر کے پی اور وزیر اعلیٰ بلوچستان کی ملاقاتیں

اسلام آباد(راحت منیر/اپنے رپورٹرسے) پاکستان پیپلزپارٹی کے چیئرمین بلاول بھٹو زرداری سے وفاقی دارالحکومت میں نائب وزیر اعظم اسحاق ڈار،گورنر کے پی کے فیصل کریم کنڈی اور وزیر اعلیٰ بلوچستان میر سرفراز بلتی نےملاقاتیں کی ہیں۔ ذرائع کے مطابق بلاول بھٹو زرداری اور اسحاق ڈار کے درمیان پاکستان پیپلز پارٹی اور ن لیگ کے درمیان پاور شیئرنگ فارمولا پرتبادلہ خیال کیا گیا،معاملات کے حل کیلئے پاکستان پیپلز پارٹی اور حکومت کی قائم کی گئی کمیٹیوں کے درمیان رابطوں پر اتفاق کیا گیا۔اس موقع پر سابق وزیراعظم راجہ پرویز اشرف، گورنر خیبرپختونخوا فیصل کریم کنڈی اور وزیراعلیٰ بلوچستان سرفراز بگٹی بھی موجود تھے۔،ذرائع کے مطابق بلاول بھٹو زرداری اور اسحاق ڈار کے درمیان ملاقات میں پاور شیئرنگ فارمولا کے حوالے سے پاکستان پیپلز پارٹی کے تحفظات کو دور کرنے پر اتفاق ہوا ہے۔ذرائع کے مطابق پاکستان پیپلز پارٹی کی قیادت کو پاور شیئرنگ فارمولا پر عملدرآمد میں سست روی پر تشویش ہےجس کا اظہار پارٹی رہنمابرملا کررہے ہیں،گورنر پنجاب سردار سلیم حیدر کے تندو تیز بیانات بھی اسی سلسلہ کی کڑ ی ہیں،ذرائع کے مطابق پاکستان پیپلز پارٹی پاور شیئرنگ فارمولا کے تحت راولپنڈی سمیت بعض اہم اضلاع کی انتظامی مشینری میں اپنی پسند کے افسران کی تقرری چاہتی ہے تاکہ پارٹی کارکنوں اور ان کے مسائل جو برسوں سے انتظامی سطح پر نظر انداز ہورہے ہیں ان کو حل کیا جاسکے۔قبل ازیں خیبرپختونخوا کے گورنر فیصل کریم کنڈی زرداری ہاؤس پہنچے اور پاکستان پیپلزپارٹی کے چیئرمین بلاول بھٹو زرداری سے ملاقات کی اور ان کوپشاور میں ہونے والی آل پارٹیز کانفرنس سے متعلق بریفنگ دی۔