شیخوپورہ ضمنی الیکشن،ن لیگ کے رانا طاہر اقبال44535ووٹ لیکر کامیاب،PTIحمایت یافتہ اعجازبھٹی 20093ووٹ لے سکے

شیخوپورہ ، اسلام آباد(نمائندہ جنگ سے، نمائندہ جنگ)شیخوپورہ کے حلقہ پی پی 139 (فور) کے ضمنی الیکشن میں مسلم لیگ ن کے امیدوار رانا طاہر اقبال 44535 ووٹ لیکر کامیاب ہوگئے۔ تحریک انصاف کے حمایت یافتہ آزاد امیدوار اعجاز حسین بھٹی 20093 ووٹ لے سکے۔ تحریک لبیک پاکستان کے علامہ فاروق الحسن کو 7196 اور آزاد امیدوار سابق ایم پی اے میاں عبدالرؤف کو 6695 ووٹ ملے، حلقہ میں کل ووٹرز 193285 ہیں جبکہ ٹرن آؤٹ41.4 فیصد رہا۔ وزیر اعظم شہباز شریف نے شیخوپورہ ضمنی الیکشن میں ن لیگی امیدوار کی واضح برتری پر رانا طاہر اقبال کو مبارکباد دی اور اپنے بیان میں کہا ہے کہ مسلم لیگ ن کے امیدوار کی واضح برتری عوام کے پارٹی کی پالیسیوں پر اعتماد کی عکاس ہے،پی پی 139 کے ضمنی انتخاب میں عوام نے جلاؤ گھیراؤ کے بیا نیہ کو مسترد کر دیا اور انتشار کے بجائے ترقی و خوشحالی کے حق میں اپنا فیصلہ سنایا۔ مختلف پولنگ سٹیشنوں پر پی ٹی آئی اور ن لیگی کارکنوں کے درمیان تصادم اور تشدد کے واقعات بھی پیش آئے۔آزاد امیدوار میاں عبدالرؤف کو ن لیگ کے کارکنوں نے شدید تشدد کا نشانہ بنایا جبکہ فائرنگ سے ایک جماعت کا کارکن محسن علی شدید زخمی ہو گیا، لڑائی جھگڑے کے دیگر واقعات میں 10 افراد کے زخمی ہونے کی اطلاعات ہیں۔