صدر زرداری سے چینی وفد کی ملاقات، مختلف شعبوں مٰں سرمایہ کاری بڑھانے پر غور

اسلام آباد (نمائندہ خصوصی) صدر مملکت آصف علی زرداری نے پاکستان اور چین کے مابین اقتصادی اور تجارتی تعاون فروغ دینے کی ضرورت پر زور دیتے ہوئے کہا ہے کہ دونوں ممالک کے عوام بالخصوص سرمایہ کاروں اور کاروباری اداروں کے درمیان روابط بڑھانا ہوں گے۔ ایوانِ صدر کے مطابق ان خیالات کا اظہار انہوں نے بلاول ہائوس کراچی میں چین کے کاروباری وفد سے ملاقات کے دوران گفتگو کرتے ہوئے کیا۔ ملاقات میں وزیراعلیٰ سندھ سید مراد علی شاہ، صوبائی وزراء اور چین کے قونصل جنرل نے شرکت کی۔ صدر مملکت نے پاکستانی معیشت کے مختلف شعبوں میں چینی سرمایہ کاری بڑھانے پر زور دیا۔ وفد نے ملکی شعبہ صحت کی ترقی کے لئے پاکستان میں میڈیکل سٹی کے قیام کے لئے ایک ارب ڈالر کی سرمایہ کاری میں دلچسپی کا اظہار کیا۔ وفد نے معیشت کے مختلف شعبوں بالخصوص زراعت، لائیو سٹاک، توانائی، ٹرانسپورٹ اور مینوفیکچرنگ میں سرمایہ کاری میں دلچسپی کا بھی اظہار کیا۔ صدر آصف علی زرداری نے کہا کہ گوادر پورٹ کو ایک علاقائی تجارتی اور اقتصادی مرکز کے طور پر ترقی دینا میرا وژن تھا۔ انہوں نے کہا کہ گوادر بندرگاہ سے نہ صرف علاقائی روابط بہتر ہوں گے بلکہ علاقائی تجارت اور اقتصادی تعاون کو بھی فروغ ملے گا۔