پٹرول 0.81روپے مہنگا ،ڈیزل 3.94 روپے سستا ہونے کا امکان

اسلام آباد ( خالد مصطفیٰ )16 دسمبر 2024 سے اگلے پندرہ دن کے لیے پٹرول کی قیمت میں معمولی اضافہ 0.81 روپے فی لیٹر جبکہ ڈیزل کی قیمت میں 3.94 روپے فی لیٹر کی معقول کمی متوقع ہے۔موجودہ پندرہ دن کے پہلے 12 دنوں میں حکام نے عالمی مارکیٹ میں شام میں حکومت کی تبدیلی کے باعث غیر یقینی صورتحال کی وجہ سے پٹرول کی قیمت میں معمولی 0.81 روپے فی لیٹر اضافے اور ہائی اسپیڈ ڈیزل (HSD) کی قیمت میں 3.94 روپے فی لیٹر کمی کا تخمینہ لگایا ہے۔ اگر شام کی صورتحال جلد مستحکم ہو جاتی ہے تو پٹرولیم مصنوعات کی قیمتیں مزید کم ہو سکتی ہیں۔فی الوقت عالمی مارکیٹ میں خام تیل اور پٹرولیم مصنوعات وافر مقدار میں دستیاب ہیں لیکن طلب کم ہے۔ ماہرین کا خیال ہے کہ حکومت پٹرول کی قیمت میں بھی کمی کر سکتی ہے۔12 دن کے تخمینے کے مطابق پٹرول کی قیمت 16 دسمبر سے 252.92 روپے فی لیٹر ہو سکتی ہے، جس میں 0.81 روپے فی لیٹر اضافہ ہوگا۔ ڈیزل کی قیمت موجودہ 258.43 روپے فی لیٹر سے کم ہو کر 254.53 روپے فی لیٹر ہو سکتی ہے، یعنی 3.94 روپے فی لیٹر کی کمی۔مٹی کے تیل کی قیمت میں بھی 3.97 روپے فی لیٹر کمی متوقع ہے، جس سے یہ موجودہ 164.98 روپے فی لیٹر سے کم ہو کر 161.01 روپے فی لیٹر پر آ جائے گی۔لائٹ ڈیزل کی قیمت میں بھی 3.55 روپے کی کمی ہو سکتی ہے، جس سے یہ موجودہ 151.73 روپے فی لیٹر سے کم ہو کر 148.18 روپے فی لیٹر پر آ جائے گی۔