وفاقی اپیکس کمیٹی کا فیصلہ: پنجاب میں ’’ ڈسٹرکٹ کوآرڈینیشن کمیٹیوں ‘‘ کا قیام شروع

لاہور(آصف محمودبٹ ) وفاقی اپیکس کمیٹی میں فیصلے کے بعد پنجاب میں حکومتی پالیسیز اور رولز اینڈ ریگولیشنز پر مائیکرو لیول تک پر عملدرآمد کے لئے’’ ڈسٹرکٹ کوآرڈینیشن کمیٹیوں ‘‘ کے قیام پر کام کا آغاز کر دیا گیا ہے۔ ’’جنگ‘‘ کو حاصل تفصیلات کے مطابق ڈسٹرکٹ کوآرڈنیشن کمیٹیوں کے مینڈیٹ میں ریاست کی طرف سے کئے گئے سخت پالیسی فیصلوں پر عملدرآمد کرانا،ہر ضلع میں قانون اور رولز /ریگولیشنز پر عملدرآمد کو یقینی بنانا، وفاقی و صوبائی اپیکس کمیٹیوں کی طرف سے کئے جانے والے فیصلوں پر عملدرآمدکرانا شامل ہیں۔ ڈسٹرکٹ کوآرڈنیشن کمیٹیوں کو سمگلنگ، منشیات، بجلی چوری، نان کسٹم پیڈ آئٹمز، وئیرہائوسز، غیر قانونی پٹرول پمپس، پردے کے پیچھے چھپ کر غیر قانونی کام کرنے والے عناصر، بڑے شہروں کے مضافات میں غیر قانونی آبادیوں اور ان میں ہونے والی سرگرمیوں خلاف کاروائیوں کا اختیار ہوگا۔ ڈسٹرکٹ کوآرڈنیشن کمیٹیوں کو تمام بڑے شہروں میں سیف سٹیز اتھارٹیز کے قیام، مدارس کی رجسٹریشن کے ساتھ ساتھ مدرسہ و مساجد ریفارمز پر عملدرآمد کروانے ، ماہانہ کوآرڈنیشن /ریویو میٹنگز کرنے اور صوبائی امپلیمنٹیشن کمیٹی کے ساتھ قریبی رابطہ رکھنے کا مینڈیٹ حاصل ہوگا۔’’ڈسٹرکٹ کوآرڈنیشن کمیٹیوں‘‘ کی سربراہی اضلاع کے ڈپٹی کمشنر اور متعلقہ بریگیڈ کمانڈر /کمانڈنگ افسر مشترکہ طور پر کریں گے جبکہ دیگر ممبران میں اضلاع کے ڈی پی او ز، ایف آئی اے، اے این ایف، سی ٹی ڈی، آئی بی، آئی ایس آئی اور ایم آئی کے سابق نمائندوں کے علاوہ اگر ضرورت ہوئی تو کسٹمز کے سابقہ نمائندے بھی کمیٹیوں میں شامل ہونگے۔