برازیل میں خوفناک ٹریفک حادثہ، 32 افراد ہلاک

کراچی(نیوزڈیسک)برازیل میں خوفناک ٹریفک حادثے کے نتیجے میں کم از کم 32افراد ہلاک ہوگئے۔غیر ملکی خبر رساں ادارے کے مطابق فائر حکام نے بتایا کہ جنوب مشرقی برازیل میں بس اور ٹرک کے درمیان تصادم کے نتیجے میں دونوں گاڑیوں میں آگ لگ گئی اور کم از کم 32افراد ہلاک ہو گئے۔ریاست کے ملٹری فائر ڈپارٹمنٹ نے بتایا کہ حادثے میں 32سے 35کے درمیان افراد کی موت ہوئی ہے۔مزید کہنا تھا کہ متاثرین کی حالت کے سبب فوری طور پر اموات کی حتمی تعداد بتانا ممکن نہیں ہے۔خبر رساں ادارے نے رپورٹ کیا کہ ابتدائی طور پر فائر فائٹرز نے بتایا کہ 45 مسافروں کو لے جانے والی بس کا ٹائر پھٹ گیا، جس کی وجہ سے ڈرائیور کنٹرول کھو بیٹھا اور فیڈرل ہائی وے پر آنے والے ٹرک سے تصادم ہو گیا۔