حکمرانوں کی عیاشیوں اور بدمستیوں کی وجہ سے پاکستان دولخت ہوا،حافظ حمداللہ

جیکب آباد ( آن لائن ) جمعیت علماء اسلام کے رہنما و سابق سینیٹر حافظ حمد اللہ نے کہا ہے کہ حکمرانوں کی عیاشیوں اور بدمستیوں کی وجہ سے پاکستان دولخت ہوا، حمود الرحمن کمیشن کی رپورٹ میں سب کچھ واضح ہے ملک توڑنا دہشت گردی ہے اور جس پر ثابت ہوکہ وہ ملک توڑنے کا مجرم ہے اس کو مینار پاکستان پر لٹکا یا جائے۔ ختم نبوت کانفرنس سے خطاب کرتے ہوئے انہوں نےکہا کہ یہ ملک نہ جمہوری ہے نہ اسلامی اور نہ قائد اعظم کا پاکستان ہے، ہم اس ملک کو علامہ اقبال کے خواب اور قائد اعظم کی کوشش سے بنا ملک بنانا چاہتے ہیں۔ علماء نے تو ملک کو جوڑنا چاہا اس ملک کو آئین دیا۔ یہ ملک آئی ایم ایف کے لیے نہیں بنا اس ملک کے قانون ایف اے ٹی ایف کے کہنے پر نہیں بلکہ عوامی امنگوں کے تحت بنے گے۔ اقتدار کی خاطر اپنے عقیدے کا سودا کبھی نہیں کریں گے ، جن حکمرانوں کو 77سال سے حکومتیں ملتی رہی وہ ہمیشہ سے خائن رہی ہیں۔ جو انگریزوں کے چاپلوس اور جاسوس رہے آج وہی اس ملک پر حکمران ہیں اور اس ملک میں اسلامی نظام کے نفاذ میں روکاٹ بھی وہی چاپلوس ہیں۔