صائم ایوب فریکچر کے باعث چھ ہفتے تک کرکٹ سے باہر،پی سی بی

کراچی(نمائندہ جنگ)پاکستان کرکٹ بورڈ نے کہا ہے کہ ٹیسٹ اوپنر صائم ایوب کیپ ٹاون ٹیسٹ سے مکمل باہر ہونے کے بعد ڈیڑھ ماہ کرکٹ مقابلوں میں حصہ نہیں لے سکیں گے ۔ پلاسٹر کٹنے کے بعد انہیں ری ہیب سے گذرنا پڑےگا،آئی سی سی چیمپنز ٹرافی میں ان کی شمولیت فٹنس سے مشروط ہوگی۔ہفتے کو ترجمان نے کہا کہ پاکستان کے اوپنر صائم ایوب دائیں ٹخنے میں فریکچر کے سبب چھ ہفتے تک کرکٹ سے باہر ہو گئے ہیں۔صائم ایوب کو یہ فریکچر جمعہ کے روز جنوبی افریقاکے خلاف کیپ ٹاؤن میں دوسرے ٹیسٹ میچ کے پہلے دن فیلڈنگ کرتے ہوئے ہوا تھا۔جمعہ کی دوپہر کی گئی ایم آر آئی نے فریکچر کی تصدیق کی ہے جس کے بعد صائم ایوب کے ٹخنے کو میڈیکل مون بوٹ سے فکس کردیا گیا ہے۔اگرچہ صائم ایوب ٹیسٹ میں مزید حصہ نہیں لیں گے تاہم وہ ٹیم کے ساتھ رہیں گے اور ٹیسٹ ختم ہونے کے بعد پاکستان ٹیم کے ساتھ وطن واپس آئیں گے۔اوپنر کی رپورٹس پر مزید مشاورت کیلئے برطانوی ماہرین کی خدمات لی گئی تھیں۔