گوادر: سالِ نو کے موقع پر ضلعی انتظامیہ کی جانب سے تقریب

گوادر(خ ن) ضلعی انتظامیہ گوادر کی جانب سے پدی زر پارک پر نئے سال کی آمد کے موقع پر ایک شاندار اور رنگا رنگ تقریب کا انعقاد کیا گیا، جس میں ڈپٹی کمشنر حمود الرحمٰن، جی ڈی اے اور سول سوسائٹی نے بھرپور تعاون کیا۔ تقریب کے مہمان خصوصی ڈی آئی جی پولیس مکران رینج پرویز عمرانی تھے۔تقریب میں ڈائریکٹر جنرل جی ڈی اے شفقت انور شاہوانی، ایڈیشنل ڈپٹی کمشنر (ریونیو) بوہیر دشتی، ایڈیشنل ڈپٹی کمشنر (جنرل) ڈاکٹر عبدالشکور سمیت دیگر بھی موجود تھے۔ اس موقع پر دوستانہ فٹبال میچ اور میوزیکل نائٹ شو کا بھی اہتمام کیا گیا۔میوزیکل نائٹ میں مقامی فنکاروں نے اپنی دلکش آوازوں اور شاندار پر فارمنس سے تقریب کو یادگار بنا دیا۔ بلوچ ثقافت کی نمائندگی کرتے ہوئے مختلف میوزیکل گروپس نے روایتی شنگر اور مالد کا شاندار مظاہرہ کیا جبکہ رات 12 بجتے ہی جی ڈی اے کی جانب سے آتش بازی کا شاندار مظاہرہ کیا گیا، جس نے مغربی ساحل کو جگمگا دیا۔ آسمان رنگ برنگی روشنیوں سے منور ہو گیا۔