صدر ،سپیکرقومی اسمبلی ،وزیر داخلہ کی لوئر کرم میں ڈپٹی کمشنر پرفائرنگ کی مذمت

اسلام آباد (نمائندہ خصوصی)صدر مملکت آصف علی زرداری نے لوئر کرم میں گاڑیوں کے قافلے پر فائرنگ کی شدید مذمت کرتے ہوئے کہا ہے کہ شرپسند عناصر عوام کے دشمن، فساد پھیلانا چاہتے ہیں ،عوام شرپسند عناصر کو مذموم مقاصد میں کامیاب نہ ہونے دے ۔ بیان میں صدر مملکت نے کرم میں امن کی کوششوں کو نقصان پہنچانے والوں کے خلاف سخت کارروائی کی ضرورت پر زور دیا۔انہوںنے ڈپٹی کمشنر سمیت فائرنگ کے نتیجے میں زخمی ہونے والوں کیلئے جلد صحتیابی کی دعا بھی کی۔سپیکر قومی اسمبلی سردار ایاز صادق نے لوئر کرم میں فائرنگ کا واقعہ ضلع کرم میں امن معاہدے کو ناکام بنانے کی سازش ہے ،شرپسند عناصر کو کرم میں امن معاہدے کو سبوتاژ کرنے کی ہرگز اجازت نہیں دی جائے گی۔ سردار ایاز صادق نے فریقین سے پر امن رہنے اور امن معاہدے پر عمل درآمد کرنے کی اپیل بھی کی۔ وفاقی وزیر داخلہ محسن نقوی نےفائرنگ سے زخمی ڈپٹی کمشنر جاوید اللہ محسود کی جلد صحتیابی کیلئے دعاکی اور کہا لوئر کرم میں سرکاری گاڑیوں پر فائرنگ کا واقعہ امن معاہدہ سبوتاژ کرنے کی سازش ہے۔