کرپشن کیس میں چوہدری پرویز الٰہی پر فرد جرم عائد کرنے کا تحریری حکم نامہ جاری

11 جنوری ، 2025

لاہور (اے پی پی)لاہور کی احتساب عدالت نے کرپشن کیس میں چوہدری پرویز الٰہی پر فرد جرم عائد کرنے کا تحریری حکم نامہ جاری کرتے ہوئے گواہان 21جنوری کوطلب کرلیے جب کہ حکام سے پرویز الٰہی کی مستقل حاضری معافی کی درخواست پر جواب مانگ لیا۔ گزشتہ روز احتساب عدالت لاہور نے ترقیاتی منصوبوں میں کرپشن کے ریفرنس پرسابق وزیر اعلی پنجاب چوہدری پرویز الہٰی پر فرد جرم عائد کرنے کا تحریری حکم نامہ جاری کر دیا۔ عدالت نے گواہان کو نوٹس جاری کرتے ہوئے 21جنوری کوطلب کر لیا ۔ احتساب عدالت کے جج زبیر شہزاد کیانی نے ایک صفحے پر مشتمل جاری تحریری حکم نامہ میں قرار دیا ہے کہ چوہدری پرویز الہٰی کے مطابق عائد الزامات میں وہ قصور وار نہیں ہیں، تحریر ی حکم نامہ میں یہ بھی لکھا گیا ہے کہ پرویز الہٰی نے ٹرائل کا سامنا کرنے کا دعوی ٰکیا اورمستقل حاضری معافی کے لیے درخواست دائر کر رکھی ہے۔ عدالت نے متعلقہ حکام کو پرویز الہٰی کی مستقل حاضری معافی کی درخواست پر آئندہ سماعت پر جواب جمع کروانے کا حکم دے دیا۔