9مئی مقدمات:عمرایوب ودیگر کی بریت کی درخواستوں پر فیصلہ محفوظ

11 جنوری ، 2025

سرگودھا(این این آئی)انسداد دہشت گردی عدالت نے9مئی کے6مقدمات میں اپوزیشن لیڈر عمر ایوب اور دیگر کی بریت کی درخواستوں پر فیصلہ محفوظ کر لیا۔سرگودھا کی انسداد دہشت گردی عدالت میں اپوزیشن لیڈر قومی اسمبلی عمر ایوب، اپوزیشن لیڈر پنجاب اسمبلی ملک احمد خان بھچر، عالیہ حمزہ اور صنم جاوید سمیت دیگر کیخلاف میانوالی میں درج 6 مقدمات کی سماعت ہوئی، مختلف علاقوں سے آئے 150 سے زائد ملزمان عدالت میں پیش ہوئے۔ مقدمات میں نامزد ملزمان عمر ایوب، ملک احمد خان بھچر، عالیہ حمزہ، صنم جاوید اور بلال اعجاز چٹھہ کی جانب سے ان کے وکلا نے حاضری معافی کی درخواست دی، وکلا صفائی نے ملزمان کی بریت کی درخواست پر بحث مکمل کرلی۔بعدازاں عدالت نے ملزمان کی حاضری معافی کی درخواست منظور کرلی ، عدالت نے آئندہ سماعت پر ملزمان کی حاضری یقینی بنانے کا حکم دیتے ہوئے کیس کی مزید سماعت 17 جنوری تک ملتوی کردی۔