وزیراعظم کی ترسیلات زر میں اضافے پر قوم کو مبارکباد

اسلام آباد (نیوز رپورٹر، ایجنسیاں) وزیراعظم محمد شہباز شریف نے ترسیلات زر میں اضافے پر قوم کو مبارکباد دیتے ہو ئے کہا ہے کہ ترسیلات زر میں اضافے سے ملکی معیشت کا پہیہ جام کرنے کا نعرہ لگانے والوں کے دعوے دھرے کے دھرے رہ گئے، پاکستان معاشی استحکام کے بعد معاشی ترقی کی راہ پر گامزن ہوچکا ہے، محصولات کے کیسز فوری حل کیے جائیں، ایف بی آر محصولات کے مقدمات میں تاخیر کسی صورت براشت نہیں کی جائیگی، وزیر اعظم نے پی آئی اے کی یورپ کیلئے پروازوں کی بحالی پر عوام کو مبارکباد دیتے ہوئے کہا کہپی آئی اے کی یورپ کیلئے پروازوں کی بحالی سے بیرون ملک مقیم پاکستانیوں کو سہولت ہوگی، حکومت نے قومی ایئر لائن کا تشخص بحال کیا،وفاقی وزیر احسن اقبال نے کہنا ہے کہ اوورسیز پاکستانیوں نے پی ٹی آئی کی اپیلوں کو خاک میں ملا دیا،مہنگائی کو 38 سے 4 فیصد پر لانا حکومت کی بڑی کامیابی ہے، دوسری جانب پی ٹی آئی کے سیکرٹری اطلاعات شیخ وقاص اکرم کا کہنا ہے کہ بیرون ملک سے ترسیلات روکنے کی اپیل کا اثر اگلے دو تین ماہ میں نظر آئیگا۔ تفصیلات کے مطابق وزیراعظم شہباز شریف نے کہا ہے کہ دسمبر 2024 تک 3 اعشاریہ 1 بلین ڈالر ترسیلات زر وصول ہوئیں جو کہ نومبر 2024 سے 5 ا عشاریہ 6 فیصد زیادہ ہے، ترسیلات زر میں اضافہ ہمارے بیرون ملک پاکستانی بھائیوں اور بہنوں کے ملک و قوم کی ترقی میں اپنا کردار ادا کرنے کے آہنی عزم کی سند ہے۔علاوہ ازیں وزیراعظم شہباز شریف نے ہدایت کی ہے کہ ایف بی آر محصولات کے مقدمات کے جلد سے جلد نمٹائے جانے کیلئے فوری اقدامات کرے۔ وزیر اعظم نے یہ ہدایت گزشتہ روز ان لینڈ ریونیو کے اپیلیٹ ٹربیونلز کے امور کا جائزہ لینے کیلئے بلائے گئے اجلاس کے دوران دی ۔ وزیراعظم نے کہا کہ اپیلیٹ ٹربیونلز ان لینڈ ریونیو میں بین الاقوامی معیار کی افرادی قوت کو مسابقتی تنخواہوں، مراعات اور پیشہ ورانہ ٹیلنٹ کی بنیاد تعینات کیا جائے۔انہوں نے کہا کہ ملک و قوم کی ایک ایک پائی کا تحفظ کرینگے۔ٹیکس نا دہندگان سے ٹیکس وصول کرینگے نہ کہ غریب عوام پر ٹیکس کا مزید بوجھ ڈالیں ڤ۔ اجلاس میں وفاقی وزیر اقتصادی امور احد خان چیمہ، وزیرِ مملکت برائے خزانہ علی پرویز ملک، اٹارنی جنرل اور متعلقہ اعلی حکام نے شرکت کی۔ علاوہ ازیں وزیر اعظم نے پی آئی اے کی یورپ کیلئے پروازوں کی بحالی کے بعد پیرس کیلئے پہلی پرواز کی روانگی پر عوام کو مبارکباد دی ہے۔ انہوں نے کہا کہ پروازوں کی بندش سے قومی ایئر لائن کو اربوں ڈالر کا نقصان اور اسکی ساکھ متاثر ہوئی۔ وزیراعظم نے کہا کہ یورپ پروازوں کی بحالی کے بعد پی آئی اے ترقی کی جانب گامزن ہے۔ دوسری جانب پاکستان تحریک انصاف نے کہا ہے کہ اوورسیز پاکستانیوں سے ترسیلات روکنے کی اپیل کا اثر اگلے دو تین ماہ میں نظر آئیگا۔پشاور میں پریس کانفرنس کے دوران پی ٹی آئی کے سیکرٹری اطلاعات شیخ وقاص اکرم نے کہا کہ مالی سال 2022 میں ترسیلات زر 32 ارب ڈالرز تھیں جبکہ 2024میں 27 ارب ڈالرز رہی ہیں۔انہوں نے کہا کہ 2022میں شرح نمو 6.5 فیصد اور 2024 میں 2.4 فیصد سے بھی کم رہی ہے۔ شیخ وقاص اکرم کا کہنا تھاکہ اوورسیز پاکستانیوں سے ترسیلات روکنے کی اپیل کا اثر اگلے دو تین ماہ میں نظر آئےگا۔وزیراعلیٰ خیبرپختونخوا کے مشیر برائے خزانہ مزمل اسلم کا کہنا تھاکہ کھوکھلے وژن صرف ن لیگ کی حکومت میں ہی آتے ہیں مگر اڑان پاکستان میں تو حد ہی ہوگئی ہے، اڑان پاکستان کہتا ہے 2030 سے 2047تک شرح نمومسلسل 9.98 فیصد تک رہے گی۔انہوں نے کہا کہ خیبرپختونخوا کا 725 ارب روپے کا مجموعی قرض ہے، اتنا قرض شہباز نے صرف ایک ہفتے میں لیا، ہمارے دفاتر سے اب پنجاب والے پوچھ رہے ہیں کہ کیسے ہم نے معیشت کو بہتر کیا۔علاوہ ازیں وفاقی وزیر برائے منصوبہ بندی و ترقی احسن اقبال نے کہا کہ مہنگائی کو 38 سے 4 فیصد پر لانا حکومت کی بڑی کامیابی ہے، آئندہ وقت میں اشیا کی قیمتوں میں ٹھہراؤ آئے گا۔مسلم لیگ ن کے رہنما مظفر شجرہ کی رہائشگاہ پر میڈیا سے گفتگو کرتے ہوئے وفاقی وزیر احسن اقبال نے کہا کہ اوورسیزپاکستانیوں نے ترسیلات روکنے کے منصوبے بنانے والوں کی اپیلوں کو خاک میں ملا دیا، اوورسیز پاکستانیوں نے اڑان پاکستان میں اپنا حصہ ڈالا، اڑان پاکستان کے ذریعے ملک کو تیزی سے بڑھتی معیشت میں ڈھالنا ہے۔انہوں نے کہا کہ اب وقت ہے نوجوانوں کو بہترین تعلیم اور ہنر فراہم کیا جائے، برآمد کنندگان کے لئے رکاوٹیں ختم کی جائیں، دنیا میں معیشت کا مقابلہ ہے، ہمیں دنیا سے مقابلہ کرنا ہے، جس ملک کی سڑکوں ہر انتشار ہوگا وہاں سرمایہ کار کیسے آئیگا۔وفاقی وزیر نے مزید کہا کہ تحریک انصاف وہ کام کر رہی ہے جو کبھی ’’را‘‘ کو کرنے کی ہمت نہیں ہوئی، امریکا یورپ میں رائے عامہ کی توجہ فلسطین سے ہٹا کر پی ٹی آئی پر مرکوز کرنے کی کوشش کی جا رہی ہے۔احسن اقبال نے کہا کہ پی ٹی آئی کی بین الاقوامی ٹیم اسرائیل اور بھارت کو بیل آؤٹ فراہم کر رہی ہے، پی ٹی آئی پاکستان مخالف لابیز کا آلہ کار بنی ہوئی ہے۔